Превентивна стоматологија

Оваа книга претставува современ и сеопфатен учебник по превентивна стоматологија, подготвен врз основа на долгогодишно научно и клиничко искуство, како и најновите достигнувања во оваа динамична област. Таа има за цел да понуди јасен, систематизиран и применлив преглед на принципите и практиките што го сочинуваат темелот на современата дентална медицина - зачувувањето на оралното здравје преку превенција. Ракописот е структуриран во 19 поглавја и три апендикси, во кои се опфатени клучните концепти на примарна, секундарна и терцијарна превенција, епидемиологијата и факторите на ризик за најчестите орални заболувања, како и современите методи за нивна контрола и спречување. Посебен акцент е ставен на оралната хигиена, фруоридната профилакса, улогата на исхраната, контролата на плакот и примената на превентивни клинички постапки како што се залевањето на фисури и јамички. Учебникот дава значајно место и на орално-здравственото воспитување, промоцијата на здравјето и програмите за јавно орално здравје, како и на скринингот и раната детекција на болестите. Во согласност со современите трендови, обработени се и можностите за примена на дигиталните технологии во превентивната стоматолошка практика, како и специфичните пристапи кај различни групи пациенти. Ова издание е наменето пред сѐ за студентите по дентална медицина, но претставува вреден извор и за специјализантите и стоматолозите во клиничката пракса, како и за сите здравствени професионалци кои сакаат да ги продлабочат своите знаења во областа на превентивната стоматологија. Неговата цел е да послужи како практичен водич, но и како сигурна научна основа за унапредување на квалитетот на оралното здравје.