Вардарска

„Вардарска" се темели на идентитетската врска на поетесата со сопствената земја — како Македонка, а потоа и како велешанка, таа е — вардарска. Надоврзувајќи се на таа нишка, збирката е поделена на шест циклуси кои го следат животниот тек на реката Вардар, уникатно илустрирани од Марко Трпески. Поезијата во нив е напишана во слободен стих кој низ едноставен јазик носи егзистенцијалистичка и универзална интроспекција со силна социјална свест. Преку својот експериментален израз, Грубор зборува од аспект на романтичарскиот Велтшмерц на нејзината генерација заглавена меѓу напредок и бесмисленост, и успешно плива „спротиводно“. Елена Пренџова БИО:Марија Грубор (Велес, 1992) е поетеса со препознатлив глас на македонската поетска сцена. „Вардарска“ е нејзина трета стихозбирка, на која ѝ претходат „Ликвид“ (2009) и „Водата нешто носи“ (2015). Таа е двократна национална победничка во слем-поезија, настан на кој настапила како македонски претставник на Европскиот слем-шампионат во Будимпешта (2018) и Брисел (2024). Нејзините песни се застапени во повеќе зборници и антологии на македонската поезија и се преведени на неколку европски јазици. Активно настапува на поетски фестивали и културни настани во Македонија и во странство. Работи како психолог и психотерапевт под супервизија.