Оваа книга ме натера да помислам на тебе

Тили Најтингејл е вчудовидена кога од локалната книжарница ѝ се јавуваат да ѝ кажат дека кај нив ја чека роденденски подарок од нејзиниот сопруг. Делумно зашто не се сеќава кога последен пат читала книга од задоволство, а главно зашто Џо е починат веќе пет месеци. Кога оди да го подигне подарокот, Алфи, сопственикот на книжарницата, со топол и љубезен поглед, ѝ ја објаснува замислата на Џо. На секој први од месецот, Тили ќе добива по една книга со рачно напишано писмо од Џо. Така тој ќе се обиде да ѝ помогне да ја сврти страницата на нејзината прва година без него. Отпрвин, Тили не може да си замисли да се задлабочи во фиктивниот свет, но нежните зборови на Џо ја поттикнуваат да се обиде. И имал право. Наскоро Тили не може да ги испушти книгите од раце и ново поглавје од нејзиниот живот почнува да се испишува. Посетите на книжарницата и длабоките и искрени разговори со Алфи ѝ ја нудат потребната утеха, но и ја охрабруваат да се впушти во авантури поттикнати од книгите на Џо, кои ќе ја однесат на разни места низ светот и ќе ѝ донесат многу нови искуства и пријателства. Годината исполнета со книги и чуда ќе ѝ овозможи на Тили одново да му се радува на животот и на новите можности, а можеби дури и на љубовта.