Се е во мислите

Не секој немир е опасност. Понекогаш стравот, паниката, вознемирените мисли, телесните реакции и внатрешната напнатост не доаѓаат за да те уништат. Доаѓаат за да ти покажат дека нешто во тебе долго време било собрано, потиснато, премолчено. Во оваа книга сакам да зборуваме за стресот и анксиозноста едноставно, човечки и смирувачки. Не како за слабост. Не како за срам. Не како за нешто од кое треба уште повеќе да се плашиш. Туку како за природна реакција на телото, умот и душата кога товарот станува преголем. Ќе се обидам да ти објаснам што се случува кога стресот се изразува преку фобии, компулсии, опсесии, психосоматски симптоми и напади на паника. Ќе се обидам да ти покажам дека многу од она што те плаши, всушност, е начин на кој твојот организам се обидува да се растовари. Ова не е книга што ќе ти вети дека никогаш повеќе нема да се вознемириш. Ова е книга што сака да ти помогне да разбереш зошто се вознеми руваш. А кога човек ќе почне да разбира што се случува во него, стравот веќе не е толку страшен, мислите веќе не се толку моќни, а душата полека почнува да наоѓа мир. Книгата „Сè е во мислите“ не е строго научна книга, ниту строго теолошка. Оваа книга е место на средба. Запознав луѓе кои се срамеа да кажат дека се анксиозни. Запознав луѓе кои по секоја цена се обидуваа да ги сокријат своите панични напади. Запознав многу прекрасни луѓе кои се затворија во своите домови и во самите себе затоа што се плашеа. Се плашеа од своите психосоматски симптоми, но и од чудните погледи на луѓето. Овие луѓе и јас работевме на нивниот проблем. Се боревме. Плачевме. Се смеевме. И на крајот — дишевме слободно. Слободата е голема работа…