.jpg)
На 11 април, во петок навечер, просторот на „Литература.мк“ во „Дајмонд мол“ пулсираше со емоции, смеа и тишина полна со значење. Во интимна атмосфера, пред публика која внимателно го следеше секој збор и движење, актерот Игор Ангелов настапи со монодрамата „Сите најубави нешта“, во режија на Дејан Пројковски.
Монодрамата „Сите најубави нешта“ од еден од најактуелните современи британски автори, Данкан Мекмилан, претставува ведро и духовито патување низ животните лузни на еден човек, кој правејќи го списокот на сите најубави нешта за кои вреди да се живее, театарскиот простор го претвора во утроба од која се раѓа колективната надеж, простор каде што шлаканиците на животот, колективно се трансформираат во нежно милување и тивок шепот дека не сме сами во она што ни се случува, дека се имаме едни со други.
Запознавајќи ја публиката со неговото милениче, неговата најголема љубов, неговата фамилија, психичките проблеми на својата мајка и траумите кои доаѓаат со тоа, протагонистот го руши четвртиот ѕид на еден досетлив, скокотлив начин и почнува да ги меша реалноста и фикцијата, потенцирајќи дека сѐ убаво и сѐ лошо што ни се случува е природно, ни припаѓа еднакво на сите, суптилно прелевајќи го животот во театар и обратно.
