.jpg)
Приказната за Мери Попинс е едно од најшармантните и најволшебни дела во детската литература. Создадена од британската авторка Памела Л. Траверс, оваа необична гувернанта со години ги освојува срцата на децата и возрасните ширум светот.
Мери Попинс е сè што едно дете може да посака - мистериозна, строга, но и бескрајно забавна. Таа доаѓа во домот на семејството Бенкс на Црешовата улица број 17, носена од ветерот од исток, со својата волшебна торба и чадор што крие повеќе тајни отколку што може да се замисли. Со неа, секојдневието станува авантура - од летање, до невозможни патувања и ситуации во кои фантазијата нема граници.
Книгата е инспирација за повеќе филмски адаптации, а најновата - Мери Попинс се враќа (2018) - носи современ, топол и музички богат продолжеток на оваа безвременска приказна.
Во режија на Роб Маршал, филмот нè враќа во Лондон во време на Големата депресија, каде што повторно се среќаваме со веќе пораснатите деца од семејството Бенкс. По тешките животни околности, Мери Попинс повторно се појавува - токму кога е најпотребна - за да внесе светлина, надеж и магија во нивните животи.
Во главната улога блеска Емили Блант како Мери Попинс, а покрај неа се појавуваат и Лин-Мануел Миранда, Бен Вишо, Мерил Стрип и други познати имиња.
„Мери Попинс се враќа“ е филм што не само што ја слави детската фантазија, туку зборува и за загубата, семејството и моќта да се најде радост дури и во најтешките моменти. Со раскошна сценографија, незаборавни музички броеви и топла емоција, ова е приказна што ги поврзува генерациите.
Но, пред да го погледнете филмот, ви препорачуваме да ја прочитате книгата „Мери Попинс“. Во неа ќе ја доживеете оригиналната магија на ликот - со сите нејзини чудесни авантури, суптилен хумор и длабоки пораки за детството и имагинацијата.
Книгата нуди богата и слоевита приказна што оди подалеку од филмската адаптација - вистинско патување во свет каде што невозможното станува можно, а секојдневието е исполнето со чудо.
Книгата „Мери Попинс“, во издание на „Либи“, дел од „Арс Ламина публикации“, е достапна во книжарниците на „Литература.мк“ и онлајн преку www.literatura.mk
