Препорака за филм според книгата „Артемис Фаул“ од Овен Колфер

Сите млади љубители на научно-фантастичните авантури овој викенд можат да уживаат во филмот „Артемис Фаул“, снимен според истоимениот роман за млади од ирскиот писател Овен Колфер. Книгата на македонски јазик е објавена од „Либи“, дел од „Арс Ламина – публикации“.

Филмот е во режија на славниот британски актер и режисер Кенет Брана, а главните улоги ги толкуваат Фердија Шо, Лара Мекдонел, Џош Гад, Тамара Смарт, Колин Фарел и Џуди Денч.

Артемис Фаул е генијалец. Има само дванаесет години. Ниедна сплетка не е премногу подла, ниеден план премногу ризичен. А сега – открива дека самовилите навистина постојат. Кутрите самовили... Но тие не се нежни суштества од приказните за добра ноќ – тие се вооружени. И се опасни. Артемис ја киднапира капетан Холи Шорт со цел да ја размени за самовилско злато. Но Холи е неверојатно опасна и многу изнервирана поради целата оваа ситуација. Артемис наскоро ќе открие дека самовилите знаат да возвратат...

Книгата, која првично е објавена во Ирска во 2001 година, е прва од книжевниот серијал „Авантурите на Фаул“, кој содржи единаесет романи што ги следат различните членови на семејството Фаул. Во првата книга, која беше опишана како „Умри машки со самовили“, дванаесетгодишниот гениј Артемис Фаул Втори и неговиот телохранител Батлер ја киднапираат Холи Шорт – капетан во самовилската полиција LEPrecon – и бараат откуп од еден тон злато, со цел да го искористат магичниот свет на самовилите и да го вратат изгубеното семејно богатство.

Првата книга доби многу позитивни критики. Во 2004 година ја освои Наградата за избор на млади читатели и Тинејџерската награда на Garden State, заедно со низа други признанија.

New York Post напиша: „Артемис Фаул е одличен... нов трилер-сказна што ќе ви го задржи вниманието, без оглед на возраста.“

Library Journal објави: „Забавна за читање, полна со акција и хумор, препорачлива за сите библиотеки и за читатели од сите возрасти.“

Time го опиша романот како: „Брз, разигран и многу духовит – инвентивна мешавина од мит и модерно време, магија и криминал.“

The New York Times Book Review напиша: „Колфер постигнал огромен, експлозивен успех.“

Observer ја оцени книгата како: „Паметна, духовита и уникатна. Сјае со високотехнолошки изуми – како Колфер да е инспириран научник исто колку што е и писател.“

Amazon.com во својата официјална рецензија истакна: „Фантастично дело од почеток до крај, 'Артемис Фаул' е лудо добра авантура од 21. век, на највисоко ниво.“

Книгата е достапна во „Литература.мк“ и во другите поголеми книжарници.