.jpg)
Приказната за Петар Пан е едно од најомилените класични дела што ја одбележале литературата за деца, но и целокупната поп-култура. Палавото момче што одбива да порасне првпат се појавува во романот на шкотскиот писател Џејмс Метју Бари. Оттогаш до денес, овој магичен свет е бескраен извор на инспирација за театар, телевизија, анимација и филм. Во срцето на приказната е момчето што може да лета, живее во мистичната земја Недојдија и постојано ги бара своите авантури: борби со пирати, дружба со Изгубените момчиња, средби со самовилки, Индијанци, сирени и, се разбира, со неговиот заколнат непријател – капетан Кука. Сè почнува кога Петар, барајќи ја својата сенка, слетува во домот на семејството Дарлинг. Таму ги запознава Венди, Џон и Мајкл, им покажува како се лета (со малку самовилска прашина!), а потоа заедно со Ѕвончица ги води во Недојдија – местото каде што детството никогаш не завршува.
Книгата е повеќепати екранизирана, а најновата адаптација – „Петар Пан и Венди“ (2023) – носи свежа перспектива за ова вечно дело.
Филмот, во режија на Дејвид Лаури, претставува нов, визуелно впечатлив и емотивен пристап кон легендарната приказна. Овој наслов е играна адаптација на Дизниевиот анимиран класик од 1953 година, но многу поблиску до духот на оригиналниот роман на Бари. Во главните улоги се: Александер Молоун како Петар Пан, Евер Андерсон како Венди и Џуд Лоу во улогата на капетан Кука.
„Петар Пан и Венди“ е приказна за која сите мислиме дека ја знаеме, но секое ново читање или гледање открива нешто друго: радоста на играта, тагата по минатото, храброста да се порасне и вредноста на фантазијата.
Оваа верзија ја истражува и посериозната страна на ликот на Петар Пан – неговата вечна потреба да остане дете, стравот од растење и комплексноста од борбата со сопствените сенки. Венди, од друга страна, ја носи темата на созревање и храброст, што ја прави оваа адаптација уште поблиска до денешната публика.
Но, пред да го погледнете филмот, ви препорачуваме да ја прочитате книгата „Петар Пан“, во издание на „Либи“, дел од „Арс Ламина публикации“. Ова дело нуди длабочина и слоевитост што не можат секогаш да бидат доловени на екран. Во него ќе откриете богата симболика за детството, невиното срце и неизбежноста на времето.
Книгата е достапна во книжарниците на Литература.мк и онлајн преку www.literatura.mk.
