.jpg)
На 28 мај (четврток), со почеток во 11 часот, во „Литература.мк“ во „Дајмонд мол“ ќе се одржи литературно-музичкиот хепенинг „Читањето е супермоќ“. На настанот, во организација на издавачката куќа „Арс Ламина“, ќе бидат наградени учениците од основните училишта кои во учебната 2025/2026 година се истакнале како „суперчитатели“, односно покажале најголем афинитет кон читањето, изнајмиле најмногу книги од училишната библиотека, имаат континуирани читачки навики и особен интерес за книги и литература. Исто така, ќе бидат наградени и менторите, а ќе се избере и „супербиблиотека“ меѓу училиштата.
На хепенингот ќе настапат ученици од неколку училишта, наградувани хорови, музички оркестри, како и истакнати музичко-сценски точки со кореографии подготвени од учениците.
Во рамките на кампањата за поттикнување на читачките вредности и навики кај децата „Читањето е супермоќ“, беше распишан конкурс кој траеше од 14 до 22 мај 2026 година.
Главната мисија на кампањата „Читањето е супермоќ“, која издавачката куќа „Арс Ламина“ ја спроведува веќе осма година, е поттикнување на читачките навики кај децата.
Целите на кампањата се: подигнување на јавната свест за значењето на читањето од најрана возраст, негување на мајчиниот јазик, поттикнување на читањето и унапредување на читачките вештини, понуда на квалитетно поминато време надвор од новите технологии, како и образовна поддршка преку збогатување на наставната програма и активностите на училишните библиотеки.
Ве очекуваме!
