Новиот интерактивен книжевен серијал „Умствени вежби, гениј“ за деца и за возрасни од авторите Карло Карцан и Соња Скалко излезе од печат во издание на „Либи“, дел од „Арс Ламина – публикации“. Во него се четири книги со умствени вежби: „Размислувај како гениј“, „Размислувај како Шерлок Холмс“, „Размислувај како Леонардо да Винчи“ и „Размислувај како Алберт Ајнштајн“. Книгите се добра вежба за мозокот за секоја возраст, а во нивната основа е дека се учи преку игра.
„Размислувај како гениј“ помага да се подобри меморијата и концентрацијата, да се активираат логичките процеси на учење, да се развива имагинацијата и креативноста.
На половина пат помеѓу прирачник и разиграна лабораториска вежбанка, „Размислувај како Шерлок Холмс“ е патување низ раскажување, активности и игри со кои ќе откриете како да го вежбате својот ум за набљудување, логика, концентрација и селективна меморија, следејќи ги трагите на најгенијалниот детектив на сите времиња.
Со „Размислувај како Алберт Ајнштајн“ ќе откриете како да го вежбате умот за истражување, логика, научен метод, страст и мотивација, следејќи ги трагите на најголемиот научник на сите времиња.
Преку „Размислувај како Леонардо да Винчи“ ќе дознаете како да го вежбате вашиот ум за љубопитност, креативност, техника и перфекција, следејќи ги трагите на најсложениот генијалец на сите времиња.
Овие книги се наменети за сите родители, наставници и воспитувачи кои сакаат да користат привлечен и игрив пристап за едуцирање на децата. Пристапот во книгите е лабораториски и разигран, ориентиран за учење преку неформална структура и овозможува:
– Да го вежбате вашиот мозок и да се подобрите со едноставни и разиграни вежби;
– Да создадете контекст во кој ќе учите полесно;
– Самовреднување на вашите таленти и вежби за вашиот ум;
– Зголемување на меморијата што се засилува со разиграни вежби;
– Подобрување на концентрацијата и зголемување на самодовербата.
На крајот на секоја книга и има решенија на игрите и на загатките за проверка, споредба и повратни информации за сработеното.
Книгите веќе се достапни во сите книжарници на „Литература.мк“, како и онлајн, преку www.literatura.mk.
