Првите училишни чекори во светот на буквите со „Букварка“

Пишувањето е една од првите големи вештини што децата ги совладуваат во почетокот од образованието. За да им помогне во овој важен процес, „Арс Ламина“ ја објави „Букварка“, новата вежбанка наменета за учениците од прво одделение во деветгодишното основно образование, чија цел е постепено и правилно усвојување на големите и на малите печатни букви од македонската кирилица.

Авторки на изданието се Билјана Стојоска Златков и Наташа Тодоровска, кои, преку внимателно осмислени и разновидни активности им овозможуваат на најмладите ученици да се запознаат со обликот на секоја буква, да го вежбаат нејзиното правилно пишување и да развиваат сигурност, прецизност и уредност.

Со постепено совладување на буквите и со нивно повторување низ практични вежби, децата ги развиваат графомоторичките вештини и ги поставуваат темелите за правилно и за читливо пишување. Притоа, учењето станува поинтересно и позабавно, а секоја успешно совладана буква е уште еден чекор кон самостојно пишување.

„Букварка“ е практична поддршка за учениците во нивните први училишни чекори, но и корисна алатка за наставниците и за родителите што ги охрабруваат децата да учат и да напредуваат со сопствено темпо.

Книгата е во издание на „Арс Ламина“ и е достапна во поголемите книжарници и онлајн преку www.literatura.mk.