 (1).jpg)
Годинава ја заокружуваме на најдобар можен начин: со пригодно одбележување на стогодишнината од смртта на еден од џиновите на светската книжевност и писател кој извршил големо влијание врз поетиката на идните џинови-наследници: Маркес, Кундера, Борхес, Ками, Јонеско, Куци... ненадминливиот Франц Кафка!
Во чест на Кафка, издавачката куќа „Арс Ламина“ под импринтот за детска литература „Либи“, ја реализира сликовницата „Девојчето и куклата што патува“. Станува збор за сликовница-омаж на најпознатата анегдота поврзана со Кафка и девојчето кое тагува по изгубената кукла. И покрај тоа што никогаш не е потврдена вистинитоста на случката, и покрај тоа што постојат различни толкувања поврзани со околностите во кои се случила, со постојаното навраќање кон неа, таа стана неодминлив дел од биографијата на Кафка.
Приказната во новата сликовница е дело на Александар Русјаков, за кого ова претставува свечено претставување во светот на литературата за деца на македонски јазик. Русјаков се држи до контурите на општоприфатената приказна, но со својот автентичен писателски израз, полн со лиричност и нежност, создава уникатно авторско дело, кое веруваме дека ќе стане ново омилено семејно четиво.
„Девојчето и куклата што патува“ внимателно и метафорично зборува за минливоста на животот, за прифаќањето на загубата, за созревањето... а пред сè за љубовта, која е отпорна на ефемерноста и која секогаш опстојува и се враќа на поинаков начин.
Книгата наскоро ќе биде достапна во поголемите книжарници и на www.literatura.mk.
