За смислата и вредностите

Опис Дополнителни информации Коментари Смислата и вредностите се двата столба на нашето постоење. Во оваа книга се говори за нив како основа на постоењето. Тие се во реципроцитет. Смислата му дава вредности на нашето постоење, додека, пак, вредностите му даваат смисла на постоењето. Текстовите во ова дело се еден вид филозофски есеи. Човекот својот живот го осмислува преку вредностите кои ги има и кон кои тежнее. Ако смислата ја градат вредностите, кои се тие? Тоа се вредностите кои се универзални или барем такви би требало да бидат: љубовта, духовноста, одговорноста, грижата за себе и за другиот, радоста, убавината, дисциплината, пријателството, трпението и уште многу други. Но, се говори и за оние состојби кои човек треба да ги надмине и да созрее личносно преку нив, како што се болката, тагата, страдањето, осаменоста и други. Во книгата се направени суптилни дистинкции меѓу оние нешта што ги сметаме за вредности, но не се, или често се поистоветуваат со вредностите. Како на пример: што е љубов, а што не е љубов, кои радости се вистински и трајни, а кои не се, потоа што е правилно дејствување, колку намерата го детерминира дејствувањето и колку придонесува за неговата вредност. Се говори за вредности(те) како на индивидуално така и на колективно ниво. Каква треба да биде интелектуалната, духовната и емотивната поставеност на индивидуата за да може да се осознае себе и светот околу себе? Како квалитетите на личноста како што се: разумот, љубовта, достоинството, дисциплината, смирението, изборите кои се прават, моралот го градат мозаикот на животот, придонесуваат за негово квалитативно подобрување? Ова се само дел од темите на кои се даваат одредени одговори.