Падот на Југославија и осамостојувањето на Македонија

Авторот Ненад Баткоски е роден 1958 година во Вевчани. Основно училиште завршил во родното место, а гимназија во Струга. Дипломирал новинарство на Факултетот за политички науки во Белград и студирал француски јазик на Филолошкиот факултет во Белград. Работел како новинар во весниците „Борба“ (1979 – 1991), „Република“ (1991 до 1993), „Долар“ (1994 и 1995) и други, а бил главен уредник на новинската агенција МИА од 1999 до 2000 година. Бил директор на списанието „МИС“, (1997 –– 1998). Соработувал со бугарскиот неделник „Време“ и со франкофонски медиуми во Лозана и Париз, како и со весници во Словенија, Хрватска, Црна Гора, Босна и Херцеговина… Како главен уредник на издавачката куќа „Бата прес“, од 1995 година до сега, подготвил за објавување преку 300 наслови од македонски автори, како и преводи од странски автори. Преведува книжевни дела од француски, српски, хрватски, бугарски и другите јужнословенски јазици. На македонски јазик се објавени негови преводи на 30 книги. Автор е на книгата „Македонска бизнис елита“ (Бата прес, Скопје, 1996 година) и коавтор на книгата „Димитар Илиевски – легенда на македонскиот шах“ (заедно со Димитар Илиевски и Љубомир Хаџи Манев, Бата прес, Скопје, 2017 година). Од 2007 до 2022 година, беше вработен и се пензионира како советник во Министерството за одбрана.