Италијанска литература и култура на барокот, просветителството и неокласицизмот

Светот е книга во која Севишниот ги запишал своите идеи и жив храм во кој, по својот пример, со живи статуи ги украсил и дното и небото - вака гласи еден од најславните стихови на барокната поезија од Томазо Кампанела, вклучени во делото со наслов „Италијанската литература и култура на барокот, просветителството и неокласицизмот“ од авторките Ева Ѓорѓиевска и Јована Караникиќ Јосимовска. Делото ги предочува спецификите на италијанската литература и култура од XVII до почетокот на XIX век, ги запознава читателите со творештвото и достигнувањата на најзначајните претставници на барокот, просветителството и неокласицизмот во Италија, имајќи ги предвид придобивките на нивното творештво и истражување врз целокупниот понатамошен развој на науката и културата на глобално ниво: хелиоцентричната теорија застапувана од Џордано Бруно, емпирискиот метод на Галилео Галилеј (покрај многу други епохални иновации), филозофијата на историјата од Џамбатиста Вико, иновативните вешти метафори на Џамбатиста Марино, реформата на театарот на Карло Голдони, општествено ангажираната поезија на Џузепе Парини, интроспективните морални драми на Виторио Алфјери, импровизирачката моќ на актерите на Comedia dellarte, вештите поигрувања со традиционалните форми и актуелните теми на Винченцо Монти и многу други новини претставени во теоретскиот дел и поткрепени во практичниот дел со извадоци од конкретните дела. Паралелно со книжевните вредности кои ги истакнува книгата, за секој од споменатите периоди е направен преглед на значајни уметнички дела од музиката, скулптурата, архитектурата или сликарството.