.jpg)
Новата сликовница во издание на „Арс Ламина“, „Шарени ириси“, е многу повеќе од илустрирана книга за деца, тоа е хибриден инклузивен проект, наменет и за лица со оштетен вид и за нивните семејства. Ова издание, кое вклучува страници со Брајово писмо е наменето за слепите и лицата со оштетен вид, на кои им е достапно преку Државното училиште за деца и младинци со оштетен вид „Димитар Влахов“, Скопје, и преку ресурсните центри за лицата со оштетен вид во нашата земја.
– Објавувањето на ова хибридно инклузивно издание на кирилско и на Брајово писмо, „Шарени ириси“, е дел од нашата мисија да ги доближиме книгите до сите читатели, вклучувајќи ги и слепите и лицата со оштетен вид. Со ова истовремено сакаме да ја зголемиме свеста за нивните потреби за достапност на квалитетни книжевни дела. Голема благодарност до Мите Стефоски и Мирослав Размоски и печатницата „Тифлографика“ од Струга, кои го препознаа значењето на овој проект и на професионален и стручен начин ги испечатија страниците со Брајовата азбука. Со објавувањето на изданието, се вклучуваме во одбележување на двестегодишнината од креирањето на Брајово писмо. Со „Шарени ириси“ ја прошируваме нашата понуда на инклузивни сликовници и книги за деца, и потсетуваме дека секој заслужува да има пристап до литературата – вели Бранка Бугариска, директор на издаваштво во „Арс Ламина“.
Ова издание на „Арс Ламина“ е со текст на Јована Матевска Атанасова и акварелните илустрации на Симонида Филипова Китановска, кои длабоко и лирски продираат во една деликатна семејна состојба во која таткото е слеп и метафорично кажано: живее во очите на својата ќерка. Со многу чувства и со специфичен ликовен сензибилитет, во „Шарени ириси“ истовремено се испишува и се исцртува љубовта помеѓу таткото и ќерката, при што темнината и светлината се во цврста прегратка. Иако сликовницата е за возрасни, со неа „владее“ едно дете, па оттаму можат да ја читаат или да им се чита и на деца.
Станува збор за книжевно-ликовна приказна, за она што се гледа и за она што не може да се види. Метафорични очи во кои живеат светлината, темнината и љубовта. Можен свет (пре)создаден низ своите или низ очите на блискиот. „Шарени ириси“ е сликовница за големи и мали, што треба да се чита, да се гледа, да се допира со... ширум отворено срце!
За пошироката читателска публика, сликовницата, која е објавена под импринтот за детска литература „Либи“, дел од „Арс Ламина – публикации“, ќе биде достапна на штандот на „Арс Ламина“ за време на Саемот на книгата 2024.
Книгата е достапна во книжарниците на „Литература.мк“ и онлајн преку www.literatura.mk.
