.jpg)
Новата сликовница „Белче“ од македонската авторка Милена Лунеска излезе од печат во издание на „Либи“, дел од „Арс Ламина – публикации“. Станува збор за топла и нежна приказна за љубопитноста, за храброста и за желбата да се открие светот, дури и кога сè околу нас нè потсетува да бидеме трпеливи.
Во дворот на малиот Тео, под леата со цвеќиња покриена со дебела снежна покривка, живее едно необично семејство – семејство кокичиња. Додека надвор беснеат зимските ветрови, тие гушнати мируваат и сонуваат за топлото сонце и за доаѓањето на пролетта. Сите трпеливо ја чекаат пролетта, освен Белче, најмалото кокиче.
Белче е љубопитно и нетрпеливо. Наместо да чека, сака да дознае што се случува над снежната покривка и да го запознае светот што го опкружува. Неговата приказна ги потсетува најмалите читатели дека љубопитноста е прекрасен начин да учиме, да растеме и да го откриваме животот.
Со својата едноставна и топла приказна, „Белче“ носи порака за храброста да се направи првиот чекор, но и за љубовта и сигурноста што ги наоѓаме во семејството.
Милена Лунеска е родена во Кичево во 1963 година. По професија е економист и многу години раководи со сопствена фирма. Последниве години, сепак, бројките ги заменува со зборови, посветувајќи им се на пишувањето и на семејството.
Пишува проза и поезија, кои се објавувани на повеќе македонски портали, како и во списанија во Црна Гора и во Хрватска. Авторка е на четири романи: „Два часа“, „Исчистени души“, „Ќерката на премиерот“ и „Добро утро, љубов!“, како и на стихозбирката „Љубов облечена во бело“.
Сликовницата „Белче“ е достапна во сите поголеми книжарници на „Литература.мк“ и онлајн преку www.literatura.mk.
