.jpg)
.jpg)
По големиот успех на романите: „За пет години“, „Едно лето во Италија“ и „Рок на траење“, Ребека Серл се враќа со уште една емотивна приказна за љубовта, за семејството, за изборите и за вторите шанси. Нејзиниот нов роман „Само еднаш“, кој излезе од печат на македонски јазик, во издание на „Арс Либрис“, дел од „Арс Ламина – публикации“, ги носи читателите во свет, во кој еднаш во животот можеме да се вратиме назад и да промениме еден единствен момент.
Во семејството Новак жените се раѓаат со необичен дар: само еднаш во животот можат да го вратат времето назад. Лорен уште од својата петнаесетта година знае дека нејзината мајка Марсела го спасила нејзиниот татко од смртоносна сообраќајна несреќа. Но, откако го искористила својот единствен дар, Марсела живее во постојан страв од она што веќе нема да може да го промени. Нејзината мајка Силвија е нејзина целосна спротивност – слободоумна, неконвенционална жена со гламурозно минато. Порасната меѓу овие две силни жени, Лорен целиот живот го поминува во исчекување на сопствената катастрофа.
Кога нејзиниот сопруг прифаќа работа во Њујорк, Лорен се враќа во домот од своето детство на брегот на Малибу. Се надева дека повторно ќе се зближи со своето семејство и ќе ја залечи тивката пукнатина што со години ја оддалечува од мајка ѝ.
Но, не очекува дека ќе се врати и Стоун, момчето од соседството,нејзината прва љубов, што ѝ го скршило срцето.
Додека повторно тоне во старите навики и чувства, Лорен почнува да се прашува дали сите избори што ја довеле до овој миг биле вистинските. И дали еден од нив можеби треба да биде избришан.
„Само еднаш“ е приказна за љубовта што не исчезнува со годините, за семејните врски, за последиците од нашите одлуки и за онаа човечка желба што сите ја имаме – барем еднаш да можеме да се вратиме назад и да направиме поинаков избор.
Со препознатливата способност на Ребека Серл да спојува романтика, силни семејни односи и елементи на магичното, „Само еднаш“ отвора едно едноставно, но моќно прашање: ако добиете само една шанса да го промените минатото – кој момент би го избрале?
„Само еднаш“ премиерно е достапна во маркетите „Кам“, а наскоро ќе може да се најде и во сите поголеми книжарници низ земјава.
