.jpg)
На Светскиот ден на литературата за деца издавачката куќа „Арс Ламина“ го распишува традиционалниот литературен и ликовен конкурс „Читањето е супермоќ“. На овој креативен предизвик, кој ќе трае од 2 април до 2 мај 2025 година, право на учество имаат сите деца од градинките и учениците од основните училишта од целата држава.
Децата од градинките, на возраст од 4 до 6 години, можат да учествуваат со цртежи инспирирани од светот на приказните, додека учениците од основните училишта можат да ги праќаат своите цртежи, поетски или прозни творба инспирирани од светот на книгите, читањето и литературата.
Победниците ќе бидат соопштени и наградени на посебен настан. Наградниот фонд се состои од дипломи и книги обезбедени од „Арс Ламина“.
Tворбитe на тема „Читањето е супермоќ“ ги очекуваме на следната е-адреса: libi@arslamina.com.
При конкурирањето, треба да бидат наведени следните податоци: име, презиме, ментор, возраст и градинка (за децата од градинки), одделение и училиште (за децата од основните училишта), како и поштенската адреса и телефонскиот контакт (од родител).
Главната мисија на кампањата „Читањето е супермоќ“, која издавачката куќа „Арс Ламина“ ја спроведува веќе седма година по ред, е поттикнување на читачките навики кај децата.
Целите на кампањата се: подигнување на јавната свест за значењето на читањето од најмала возраст и во таа смисла вклучување на колку што е можно поголем број релевантни чинители од сите сфери на нашето живеење, негување на мајчиниот јазик, поттикнување на читањето и унапредување на читачките вештини, понуда на квалитетно поминато време настрана од новите технологии, образовна поддршка преку збогатување на наставната програма и активностите на училишните библиотеки.
