„Лекција“ на познатиот автор Ежен Јонеско во „Литература.мк“, „Дајмонд мол“

На 3 април, со почеток во 20 часот, љубителите на театарот имаа несекојдневна можност да ја проследат апсурдната драма „Лекција“ од Ежен Јонеско, во организација на „Литература.мк“ во „Дајмонд мол“. Во ова брилијантно парче театар настапија Јовче Пандев, Калина Велковска и Маја Ѓурчевска.

Апсурдниот заплет на драмата се случува помеѓу искомлексираниот, но вешт професор, кој го користи своето знаење да доминира врз една ученичка која е желна за знаење. Во драмата се појавува и слугинката која е пандан на она што би требало да сигнализира опасност, но опасност која не може и не треба да биде спречена. „Лекција“ го критикува тоталитаризмот во образованието, политиката, јазикот, психологијата и сексуалноста. Низ пародија, иронија и теми на контрадикторност, повторување и вртење во круг, разбираме дека сè околу нас е бесмислено.