.jpg)
.jpg)
Новите сликовници „Предрасуди“ и „Традиција“ се вистинско летно освежување на лингвистичко-едукативната едиција „Големи зборови за мали уши“ со која им објаснуваме непознати зборови на децата преку мали приказни од секојдневието, подготвувајќи ги за светот што ги чека. Во едицијата во издание на „Либи“, дел од „Арс Ламина“ досега се објавени книгите „Градоначалник“ (од Илина Мангова, со илустрации на Александар Сотировски, „Идентитет“ (од Калина Малеска, со илустрации на Рената Јосифовска) и „Непотизам“ (од Иван Дричко, и илустрации на Здравко Гиров).
Текстот во сликовницата „Предрасуди“ е на нашиот истакнат автор Владимир Мартиновски, кој низ една умешна форма на современа басна ги подучува децата што значи ГОЛЕМИОТ, за нив непознат збор ПРЕДРАСУДИ, како да се препознае и да се спречи таквата негативна појава и практика во реалниот живот. Главни ликови се белите, црните и една сива мачка, како и девојчето Бистра – врската меѓу светот на животните и светот на луѓето како хармонична целина. Илустрациите се на младата Јована Ристоска, на којашто ПРЕДРАСУДИ ù е прва објавена сликовница. Овој интересен спој на искусен писател и млад, талентиран илустратор донесе мошне занимлив и свеж краен резултат. Како што е вообичаено во оваа едиција, и сликовницата ПРЕДРАСУДИ завршува со мало речниче (глосар), каде што на едноставен, разбирлив начин се објаснува заглавниот збор и други ГОЛЕМИ зборови (сексизам, расизам, ејџизам) употребени во приказната. Во работниот дел, децата-читатели можат да одберат или да нацртаат своја шарена мачка, без никакви предрасуди!
Сликовницата „Традиција“ е авторско дело на две искусни авторки. Текстот е на Елизабета Баковска, илустрациите се на Александра Филипоска. И двете досега се имаат реализирано (и) во литературата за деца, а нивната соработка овој пат носи симпатична, лирска сликовница за оживување на обичаите од минатото, кои несомнено ја збогатуваат сегашноста со вистински, трајни вредности. Раскажувајќи за јуфки, еклери, индијанки и боза, Баковска ги поврзува генерациите. Сегашните родители ги поврзува со своите деца на еден длабок и суштински начин, преку спомени и навики од нивните дамнешни детства. Пораката е топла и разбирлива: она што го правеле некогашните деца – сегашни родители, ќе го прават и сегашните деца – родители во иднината. Традицијата е траење и препознатливост. И оваа сликовница има мал глосар на крајот, но и работен дел во кој читателите можат да ги нацртаат подзаборавените слатки, но можат и да ги поттикнат возрасните да им ги направат, за да ги вкусат поднебјето и спомените... За да ја вкусат традицијата.
Книгите од едицијата „Големи зборови за мали уши“ се достапни во сите поголеми книжарници и онлајн преку www.literatura.mk.
