.jpg)
Од еден од најзначајните автори на 20 век, Греам Грин, ни пристигнува култниот роман „Тивкиот Американец“, кој сега е достапен на македонски јазик, во издание на „Арс Либрис“, дел од „Арс Ламина – публикации“.
Станува збор за безвременска и провокативна приказна што ги истражува тенките граници меѓу идеализмот и реалноста, љубовта и моралот, политиката и личната одговорност. Првпат објавен во 1956 година, романот и денес останува вознемирувачки и пророчки портрет на наивноста на дело и е моќна и провокативна приказна за љубовта и моралот во Виетнам.
Дејството се одвива во Сајгон, во време на политички немири и воени конфликти, кога француската армија се соочува со герилците од Виет Мин. Нараторот на приказната е Фаулер - искусен и циничен британски новинар кој сведочи на сложените политички и лични судири.
Во неговиот живот влегува Олден Пајл, млад американски идеалист пратен од Вашингтон на тајна мисија. Убеден дека неговите постапки ќе донесат подобра иднина, Пајл дејствува според своите уверувања - но неговите добронамерни политики доведуваат до крвопролевање и хаос.
Како што расте напнатоста, Фаулер сè потешко успева да остане само набљудувач. Дополнителен конфликт создава и љубовниот триаголник со мистериозната Виетнамка Фуонг, која ги става на тест моралните принципи и вистинските мотиви на двајцата мажи.
„Тивкиот Американец“ е истовремено политички трилер, љубовна приказна и психолошка студија за човечката природа. Грин мајсторски ја прикажува опасноста од наивниот идеализам, но и комплексноста на личните избори, љубовта и вината.
Со својата силна атмосфера, сложени ликови и длабоки морални прашања, романот нуди пророчка визија за политичките интервенции и нивните последици.
Двапати екранизиран и сметан за едно од најзначајните дела на Греам Грин, „Тивкиот Американец“ е моќна и провокативна приказна за љубовта, моралот и човечката одговорност во време на историски пресврти.
Романот е достапен во книжарниците на „Литература.мк“ и онлајн на www.literatura.mk.
