.jpg)
Летото е совршено време за бегство од секојдневието, а нема подобар начин за тоа од добар трилер што ќе ве држи будни до доцна во ноќта. Ако уживате во приказни што ве тераат постојано да се прашувате „што следува?“, ви препорачуваме пет трилери што ќе ви го направат летото уште повозбудливо.
Жешките летни денови се создадени за одмор и за книги што ќе ви ја заледат крвта во вените. Ако сте љубители на мистерии, на опасни тајни и на приказни исполнети со неочекувани пресврти, ова лето резервирајте си место во вашиот куфер за добар трилер.
Ви издвојуваме пет возбудливи наслови во издание на „Арс Либрис“, дел од „Арс Ламина – публикации“, кои ќе ве натераат да ја свртите и последната страница во еден здив.
Станува збор за светскиот бестселер „Дивиот мрачен брег“ од Шарлот Меконаги, за интелигентниот книжевен трилер „Заплет“ од Џин Ханф Корелиц, за напнатиот психолошки трилер „Лажгото“ од Луис Џенсен, за новиот трилер од авторката на „Девојката од возот“, „Синиот час“ од Пола Хокинс, како и за книжевниот класик „Тивкиот Американец“ од Греам Грин. Подгответе се за мистерии, за тајни и за приказни кои ќе ја заледат крвта. Во продолжение запознајте се со содржината на овие романи.
„Дивиот мрачен брег“ – Шарлот Меконаги
На изолиран остров во близина на Антарктикот, семејството Солт живее како чувар на најголемата светска банка на семиња. Кога по силна бура на брегот се појавува мистериозната Роуан, мирот на островот почнува да се распаѓа, а старите тајни испливуваат на површина. Возбудлив и атмосферичен роман за довербата, за љубовта и за преживувањето на крајот од светот каков што го знаеме.
„Заплет“ – Џин Ханф Корелиц
Неуспешниот писател Џејк Бонер ја присвојува генијалната идеја за роман на својот починат студент и станува книжевна сензација. Но, кога ќе почнат да пристигнуваат анонимни пораки, тој сфаќа дека некој ја знае вистината. Интелигентен и неизвесен трилер за амбицијата, за зависта и за цената на успехот.
„Лажгото“ – Луис Џенсен
Кога мистериозниот потстанар Лук се вселува кај семејството Абот, неговото однесување станува сè почудно и повознемирувачко. Откако мајката Мел ненадејно исчезнува, нејзините ќерки почнуваат да откриваат дека нивниот дом крие опасни тајни. Напнат психолошки трилер што покажува дека никој никогаш не ја кажува целата вистина.
„Синиот час“ – Пола Хокинс
На осамениот остров Ерис, до кој може да се пристапи само неколку часа дневно, живее жена што го чува минатото на местото и неговите тајни. Кога во Лондон ќе биде направено шокантно откритие поврзано со прочуена уметница и со нејзиниот исчезнат сопруг, островот повторно станува центар на вниманието. Пола Хокинс уште еднаш создава мајсторски психолошки трилер исполнет со неизвесност.
„Тивкиот Американец“ – Греам Грин
Сместен во Виетнам за време на француско-виетнамскиот конфликт, романот ја следи сложената врска меѓу британскиот новинар Фаулер и младиот американски идеалист Олден Пајл. Политиката, љубовта и моралните дилеми постепено се претвораат во опасна игра со сериозни последици. Ова книжевно ремек-дело и денес останува актуелно и вознемирувачки пророчко.
Ако сте подготвени за лето исполнето со мистерии, со напнатост и со незаборавни пресврти, овие пет наслови се вистинскиот избор за вас.
Книгите се достапни во книжарниците на Литература.мк и онлајн преку www.literatura.mk.
