.jpg)
Од печат излезе „Приказната за Доктор Дулитл“ од Хју Лофтинг, во издание на „Либи“, дел од „Арс Ламина – публикации“, која е лектира за 7. одделение. Книгата е дел од едицијата „Лесно читливо“, создадена за полесно и поинтересно читање и за совладување на лектирните изданија.
Дополнително, книгата содржи речник со помалку познати зборови, кој им помага на учениците полесно да го следат текстот и да го збогатат својот речник, како и активности за работа на час, наменети за проверка на разбирањето и за обработка на прочитаното.
„Приказната за Доктор Дулитл“ го запознава читателот со Џон Дулитл, добар и благороден селски лекар кој има необична дарба – умее да разговара со животните. Неговата љубов спрема животните е толку голема што решава да ја напушти лекарската практика и да стане лекар за животни. Кога ќе дознае дека мајмуните во Африка се разболеле од сериозна болест, Дулитл тргнува на далечно патување за да им помогне.
Во оваа авантура го придружуваат неговите верни животински пријатели – папагалот Полинезија, бувот Ту-Ту, патката Даб-Даб, песот Џип, прасенцето Габ-Габ и мајмунот Чи-Чи. Низ нивните доживувања, книгата зборува за пријателството, за храброста, за сочувството и за љубовта спрема животните, претворајќи ја лектирата во забавно и во поучно читателско искуство.
„Приказната за Доктор Дулитл“ е достапна во книжарниците на Литература.мк, како и онлајн преку www.literatura.mk.
