.jpg)
.jpg)
Издавачката куќа „Арс Ламина“ и оваа година ги поддржа Детските Рацинови средби во Велес. На неодамна одржаното 58. издание на традиционалната манифестација, донираше 70 книги за деца и млади, читанки, лектирни изданија и детски класици, за најуспешните ученици на литературните и ликовните конкурси. Со оваа поддршка, нашата издавачка куќа ја продолжува мисијата да ги поттикне читачките навики кај најмладите и да даде поддршка на културните манифестации во нашата земја.
Детските Рацинови средби, кои се одржуваат во чест на поетот и револуционер Коста Солев Рацин, е најмасовната и најстарата книжевна манифестација за деца и млади во Македонија. Манифестацијата се одржа од 12 до 14 ноември на повеќе локации во Велес, со учество на стотици ученици од целата држава, како и гости од Србија и Хрватска.
На меѓународниот литературен конкурс на тема „Кога денот од стих се раѓа“, на кој беа пратени 1.172 литературни творби од млади автори од Македонија и ученици Македонци кои живеат во над 15 земји од светот, Гран при наградата ја освои Ефимија Новаковска, деветтоодделенка од ООУ „Владо Кантарџиев“ од Гевгелија, под менторство на проф. Елизабета Инадеска-Ефремова. Специјална награда за поетско остварување кај средношколците доби Костадин Узунов од СОУ „Јосиф Јосифовски“ – Гевгелија (ментор: Бисерка Макревска), додека првата награда ја освои Клара Ѓуровска од СУГС Гимназија „Јосип Броз Тито“ – Скопје (ментор: Елена Неделковска).
На ликовниот конкурс на истата тема учествуваа околу 350 основци и средношколци од целата држава. Прва награда освои: Христина Здравковска, ООУ „Блаже Конески“ – Велес
Ментор: Елена Димова Пантелиќ. Кај средношколците прва награда освои: Емили Исакоска, „Јахја Кемал колеџ“ – Гостивар, ментор: Олгица Гаврилоска.
Во рамките на средбите се одржаа многубројни активности: креативни грнчарски и книжевни работилници, средби со писатели, како и традиционална посета на Спомен-куќата на Рацин во стариот дел на Велес. Таму учениците имаа повеќе културни настапи и дружења, запознавајќи се одблизу со неговото творештво. Се одржаа и ораторски и рецитаторски натпревари, како и мултимедијален конкурс, каде што првата награда ја освои наставничката Виолета Трпевска од ООУ „Св. Климент Охридски“ – Драчево.
Организатори на 58. Детски Рацинови средби се МДПС „Премиера“ Општина Велес и Локалната библиотека „Гоце Делчев“.
Честитки за сите наградени и за организаторите!
Фотографиите се преземени од: https://www.facebook.com/mdps.
