.jpg)
Денес светот одбележува сто години од раѓањето на Дејвид Атенборо – легендарниот и најпознат британски автор на природонаучни филмови, природонаучник, писател и телевизиски презентер, чие име со децении е симбол за љубовта кон природата и борбата за зачувување на живиот свет. Со својот препознатлив глас, фасцинантни документарни серии и неуморна посветеност на планетата, сер Дејвид Атенборо инспирира милиони луѓе низ светот подобро да ја разберат и да ја заштитат природата.
По повод неговиот стоти роденден, потсетуваме на книгата „Животот на нашата планета“, која на македонски јазик е објавена во издание на „Арс Либрис“, дел од „Арс Ламина – публикации“.
„Животот на нашата планета“ – сведоштво и повик за будење
„Животот на нашата планета“ не е само книга – тоа е лично сведоштво, предупредување и визија за иднината на човештвото и Земјата. Во неа, Атенборо зборува за драматичните промени што ги видел во текот на својот живот и кариера, за исчезнувањето на дивината и за нарушувањето на природната рамнотежа на планетата.
„Земјата ја делиме со другите животни и со растенијата – најсовршениот замислив систем за одржување на животот, конструиран милијарди години. Стабилноста на планетата почна да се губи паралелно со намалувањето на разновидноста на живиот свет – овие две нешта се меѓусебно поврзани. Затоа, за да ја обновиме стабилноста на планетата, мораме да го обновиме биодиверзитетот, токму она што го уништуваме сега.“
Во книгата, Атенборо искрено пишува: „ Имав извонреден живот. Дури сега сфаќам колку извонреден. Како младич, додека шетав, мислев дека ја гледам дивината, дека го искусувам негибнатиот свет на природата – но, тоа беше илузија.“
„Животот на нашата планета“ е и предупредување и надеж – приказна за тоа како човештвото ја направило својата најголема грешка, но и како сè уште постои можност таа да се исправи ако дејствуваме навреме.
100 години љубов кон планетата Земја
Сер Дејвид Фредерик Атенборо е роден на 8 мај 1926 година во Ајлворт, Лондон. Уште како дете развил огромна љубов кон природата, собирајќи фосили, камења и разни природни примероци. Студирал геологија и зоологија на Кембриџ, а по службата во Кралската морнарица започнал кариера во Би-би-си.
Во 1954 година ја создава серијата „Zoo Quest“, која станува почеток на една од највлијателните телевизиски кариери во историјата. Подоцна следуваат легендарните серии: „Живот на Земјата“, „Живата планета“, „Планета Земја“, „Сина планета“, „Нашата планета“ („Life on Earth“, „The Living Planet“, „Planet Earth“, „Blue Planet“, „Our Planet“) и многу други, со кои Атенборо ги доближува чудата на природата до милиони гледачи низ светот.
Неговите документарци поставија нови стандарди во природонаучната телевизија, комбинирајќи научна прецизност, револуционерни снимателски техники и емотивно раскажување.
Во текот на својата речиси седумдецениска кариера, Атенборо добил многубројни признанија, меѓу кои повеќе БАФТА и Еми награди, како и витешка титула во 1985 година. Освен како автор и презентер, тој е и еден од најгласните светски поборници за заштита на природата, биодиверзитетот и борбата против климатските промени.
И на својот стоти роденден, Дејвид Атенборо останува една од највлијателните личности кога станува збор за подигањето на свеста за иднината на нашата планета – човек што нè потсетува дека природата не е нешто одвоено од нас, туку нашиот единствен дом.
Книгата „Животот на нашата планета“ е достапна во поголемите книжарници и онлајн преку www.literatura.mk.
