.jpg)
Нова романтична комедија што совршено ги спојува случајностите, хемијата и хаосот на првите впечатоци пристигна и кај нас. „Случајно Ејми“ од Лин Пејнтер, во издание на „Арс Либрис“, дел од „Арс Ламина - публикации“, е книга што лесно ќе ги освои љубителите на современи романтични приказни исполнети со хумор, искри и незаборавни ликови.
Eдно украдено кафе. Една мала лага. Ептен згоден тип. И едно од оние запознавања што се случуваат само во најдобрите филмови. Изабела Шеј, обично, е многу искрена личност. Но, кога постои можност да задоцни на првиот ден на својата работа од соништата и го слуша баристата како трипати ја повикува „Ејми“ без никој да се јави, не размислува двапати – се претставува како Ејми. На крајот на краиштата, тоа е истото кафе што го нарача и веќе го плати, па каква штета може да има? Освен тоа, подготвена е да ја прифати лошата карма што, можеби, си ја навлече, само за да стигне навреме.
Но, кога ќе се сврти и ќе се судри со најзгодниот маж што некогаш го видела истурајќи му го кафето врз кошулата и вратоврската, кои како да се излезени од модно списание за мажи, срцето ѝ потскокнува. Каква лоша карма? Хемијата меѓу нив е очигледна уште од првиот миг и пред неа се отвораат безброј можности... сè додека тој не рече: „Претпоставувам дека ќе се видиме утре, Ејми.“
Изи мисли дека следниот ден ќе може да ги среди работите. Но, кога пристигнува во новата канцеларија и го запознава директорот на својот оддел, Блејк Филипс, сфаќа дека тоа е преслаткиот непознат маж од кафулето. И, можеби, е шармантен со „Ејми“, но со Изи е арогантен муртенко - таков кому нејзиното објаснување воопшто не му е смешно. Сепак, малку по малку, привлечноста меѓу нив почнува да расте и ќе мора да најдат начин да работат заедно - без да пламнат - од гнев или од страст.
Со препознатлив лесен стил и духовити дијалози, Лин Пејнтер создава роман што се чита во еден здив. „Случајно Ејми“ е совршен избор за сите што сакаат современи љубовни приказни со силна хемија меѓу ликовите, забавни ситуации и емоции што постепено се развиваат. Книга што потсетува дека понекогаш најголемите приказни започнуваат токму со една мала, случајна грешка.
Книгата е достапна во книжарниците на Литература.мк и онлајн преку www.literatura.mk.
