Го одбележуваме 91. роденден на академик Влада Урошевиќ

На денешен ден, 17 октомври 1934 година, во Скопје е роден големиот македонски поет, раскажувач, романописец, книжевен и ликовен критичар, есеист, антологичар и преведувач Влада Урошевиќ.

Завршил Филозофски факултет во Скопје, а во 1987 година докторирал на Филолошкиот факултет „Блаже Конески“. Работел како соработник и уредник на Редакцијата за култура и уметност на Телевизија Скопје. Во 1982 година е избран за доцент на Катедрата за општа и компаративна книжевност на Филолошкиот факултет, а во 1988 станал редовен професор. Бил уредник на списанието „Разгледи“.

Урошевиќ е член на Друштвото на писатели на Македонија (ДПМ) од 1961 година, член на Македонскиот ПЕН-центар, член на МАНУ (од 1997 година), дописен член на меѓународната „Академија Маларме“ во Париз и редовен член на Европската поетска академија со седиште во Луксембург.

Академик Урошевиќ има објавено над 50 книги: поезија, раскази, студии, критики, есеи, антологии и романи. Добитник е на најпрестижните книжевни награди, меѓу кои: „Браќа Миладиновци“, „Григор Прличев“, „Рациново признание“, „Кирил Пејчиновиќ-Тетоец“, „Младост“, „Нолит“, наградата на Турскиот ПЕН „Халид Един Адивар“ (2007), „Стале Попов“ (2006), орденот на московската организација на Сојузот на руските писатели „Сергеј Есенин“, како и наградата „Роман на годината“, а добитник е и на Златниот венец на Струшките вечери на поезијата (СВП).

Издавачката куќа „Арс Ламина“ го објави неговиот роман „Вистинита, но не многу веројатна историја за семејството Пустополски, за куќата покрај Вардар и за четирите прстени“, кој во 2023 г.  ја доби престижната награда „Роман на годината“.  Исто така, во рамките на едицијата „Македонски книжевни класици“, реобјави три евергрин-наслови на Урошевиќ: „Вкусот на праските“, „Мојата роднина Емилија“ и „Невестата на змејот“.

Го одбележуваме 91. роденден на Влада Урошевиќ, потсетувајќи се на минатогодишната старовремска книжевна вечер во негова чест, со наслов „Вистинита, но не многу веројатна историја за проф. Урошевиќ, за факултетот покрај Вардар и за четирите студенти“, во организација на „Арс Ламина“ и „Литература.мк“.

Книгите на Урошевиќ се достапни во книжарниците на Литература.мк и онлајн на www.literatura.mk