.jpg)
Постојат книги што никогаш не ја губат својата магија. Со секоја нова генерација добиваат нови читатели, а нивните јунаци продолжуваат да инспирираат со љубопитноста, со храброста и со жедта за авантура. Меѓу најпознатите книжевни ликови се Том Соер и Хаклбери Фин – палавите момчиња создадени од Марк Твен, чии незаборавни доживувања добија и современа филмска адаптација - „Авантурите на Том Соер и Хаклбери Фин“.
Книгата „Авантурите на Том Соер“ е првиот авантуристички роман за деца на Марк Твен и едно од најчитаните дела во светската книжевност. Неговото продолжение, „Авантурите на Хаклбери Фин“, се смета за еден од првите романи во американската книжевност напишан на народен, говорен јазик и често е нарекуван првиот вистински голем американски роман.
Романите на македонски јазик се во издание на „Либи“, дел од „Арс Ламина – публикации“. Двете изданија се дел од списокот со лектири за основното образование: „Авантурите на Том Соер“ е лектира за седмо одделение, а „Авантурите на Хаклбери Фин“ за осмо одделение.
Вал Килмер во улога на Марк Твен
Возбудливите авантури на Том и на неговиот најдобар пријател Хаклбери Фин оживеаја и на големото платно во филмот „Том Соер и Хаклбери Фин“, кој премиерно беше прикажан во 2014 година. Режијата е на Џо Кастнер, а главните улоги ги толкуваат Џоел Кортни и Џејк Т. Остин. Во актерската екипа се и: Кетрин Мекнамара, Кристин Дејвис и Вал Килмер како Марк Твен.
Филмот ги следи најпознатите случувања од романите, задржувајќи ги духот на авантурата, на детската безгрижност и на силното пријателство меѓу Том и Хак. Возбудливите потери, мистериите, скриеното богатство и опасните ситуации се испреплетуваат со хумор и со топлина, правејќи ја приказната еднакво привлечна и за младите гледачи и за оние што пораснале со овие книжевни класици.
Ново читање на класиците
Во класикот „Авантурите на Том Соер“ е прикажан животот покрај реката Мисисипи во четириесеттите години на XIX век. Том е јунак во очите на своите другари, но и постојан извор на грижи за тетка му Поли. Каде и да има неволја или авантура – Том е таму. Во текот на едно незаборавно лето тој станува сведок на убиство, бега од дома за да стане пират, се вљубува во Беки Тачер, присуствува на сопствениот погреб, спасува невин човек, трага по богатство и открива кутија полна со злато.
Повеќе од 150 години по своето прво објавување, романот останува едно од најзначајните дела во светската литература за деца и за млади. Освен што нуди незаборавни авантури, тој зборува за слободата, за другарството, за одговорноста и за детската љубопитност – теми што се еднакво актуелни и денес.
„Авантурите на Хаклбери Фин“ ги следи патешествијата на Хак по реката Мисисипи, воден од желбата за слобода и за независност. На своето патување тој го запознава избеганиот роб Џим и заедно тргнуваат на незаборавна пловидба исполнета со опасности, со необични средби и со големи животни лекции. Во нивните авантури повторно се појавува и Том Соер. Преку приказната, Марк Твен ги обработува темите на предрасудите, на храброста, на човечноста и на надежта, поради што романот и денес се смета за еден од темелите на американската книжевност.
Без оглед дали прво ќе ги прочитате книгите или ќе го погледнете филмот, „Авантурите на Том Соер и на Хаклбери Фин“ ветуваат незаборавно патување исполнето со смеа, со возбуда и со безвременски животни лекции. А ако сакате да ја доживеете приказната во нејзината оригинална форма, романите на Марк Твен се вистински избор за секој љубител на добрата авантура.
„Авантурите на Том Соер“ и „Авантурите на Хаклбери Фин“ се достапни во книжарниците на Литература.мк и онлајн преку www.literatura.mk.
