.jpg)
Ако сте љубител на шпионски трилери исполнети со неизвесност, со историски настани и со незаборавни ликови, тогаш „Низ иглени уши“ од Кен Фолет е роман што не треба да го пропуштите. Ова е книгата што му донесе светска слава на Кен Фолет и подоцна доби успешна филмска адаптација.
Овој наслов, заедно со уште два шпионски трилери од Фолет: „Клучот за Ребека“ и „Страчки“ на македонски јазик се во издание на „Арс Либрис“, дел од „Арс Ламина – публикации“.
Романот „Низ иглени уши“, првично објавен во 1978 година, ја доби престижната награда „Едгар“ за најдобар роман, што ја доделува Американското здружение на писатели на мистерии. Дејството е сместено во 1944 година, во пресрет на Денот Д – еден од најважните моменти во Втората светска војна. Додека сојузниците внимателно ја подготвуваат инвазијата врз окупираната Европа и создаваат сложена мрежа од измами за да ги доведат нацистите во заблуда, една единствена информација може да ја промени судбината на војната.
Во центарот на приказната е германскиот шпион со кодно име Ди Надел, познат како Игла – ладнокрвен убиец што не остава простор за грешки. Откако ќе ги открие вистинските планови на сојузниците, започнува опасна трка со времето. Следен од британската разузнавачка служба МИ5, Игла мора по секоја цена да стигне до германската подморница и да ја пренесе клучната информација. Но, неочекуваната бура и еден осамен остров ќе го доведат до средба што може целосно да ја промени неговата мисија.
Возбудливата приказна беше пренесена и на големото платно со филмот „Низ иглени уши“ („Eye of the Needle“), кој премиерно беше прикажан во 1981 година. Режијата е на Ричард Маркванд, а во главната улога настапува Доналд Сатерленд, кој со својата впечатлива интерпретација му дава дополнителна длабочина на мистериозниот и опасен агент Игла. Покрај него, во актерската екипа се и: Кејт Нелиган, Кристофер Казенов и Иан Банен.
Филмската адаптација верно ја следи основната приказна од романот, задржувајќи ја атмосферата на неизвесност и на постојаната напнатост што го одбележуваат делото на Фолет. Покрај шпионската игра и опасните пресврти, и книгата и филмот отвораат прашања за човечката природа, за лојалноста, за љубовта и за цената на должноста во време на војна.
За љубителите на историски трилери, „Низ иглени уши“ претставува одличен избор, без оглед дали прво ќе посегнете по книгата или ќе го погледнете филмот. Ако романот ве вовлече со својата деталност и психолошка длабочина, филмот ќе ви понуди возбудлива визуелна интерпретација на една од најпознатите шпионски приказни во современата литература.
Книгата е достапна во книжарниците на Литература.мк и онлајн преку www.literatura.mk.
