.jpg)
Овој викенд ви го препорачуваме новиот филм „Бело се пере на деведесет“, кој неодамна имаше премиерна проекција во киното „Фросина“, во рамките на фестивалот „Синедејс“. Станува збор за филмска адаптација на истоимениот, наградуван роман на словенечката авторка Броња Жакељ.
Режијата е на Марко Набершник, кој заедно со авторката го потпишува и сценариото. Филмот е реализиран како копродукција на Словенија, Италија, Хрватска, Србија, Црна Гора и македонската „Црна мачка продукција“. Во една од значајните улоги се појавува и Аница Добра, која беше и гостинка на проекцијата во Скопје.
Филмот раскажува трогателна, инспиративна и суптилно хумористична приказна за животот на Броња (ја толкува Леа Цок), следејќи ја низ различни животни фази. Како дете, таа безгрижно го истражува светот со својот помлад брат Рок и наоѓа утеха кај својата баба Дада (Аница Добра). Но, детството нагло ѝ завршува со смртта на мајка ѝ од рак, а во тинејџерските години и самата се соочува со тешка дијагноза – Хоџкинов лимфом.
Приказната, заснована на вистински настани, го прикажува патот на созревањето и личната трансформација на Броња во текот на 80-тите и 90-тите години од минатиот век, нудејќи силна порака за надеж, истрајност и љубов кон животот.
Директор на фотографија е Максимилијан Сушник, монтажата е на Милица Јелача-Спасиќ, музиката ја потпишува Лука Чут, а инженер на звук е Игор Поповски.
Улогите ги толкуваат: Леа Цок, Аница Добра, Јуриј Зрнец, Тјаша Железник, Жига Шорли, Меи Рабич, Јака Мехле, Владимир Тинтор, Ива Крајнц Баргола, Саша Табаковиќ, Јуре Рајшп, Полона Јух и Блаж Доленц.
Книгата „Бело се пере на деведесет“ е во издание на „Арс Либрис“, дел од „Арс Ламина – публикации“, во едицијата „Литера модерна“, со поддршка од книжевната мрежа ТРАДУКИ. Романот ја доби највисоката словенечка книжевна награда „Кресник“ за 2019 година, а досега се продадени речиси 20.000 примероци и преведен е на повеќе јазици.
Броња Жакељ е новинарка по професија, со искуство во маркетинг и банкарство, а токму потребата за креативен израз ја води кон пишувањето на овој нејзин прв роман – дело што ѝ го отвори патот кон книжевноста.
