.jpg)
Во деновите кога плоштадите и улиците светат во празнични бои, а домoвите се исполнети со мирис на колачи, чај и топлина, природно се враќаме кон приказни што нè потсетуваат на вистинските вредности на празниците – добрината, сочувството, простувањето и љубовта. Токму ваква безвременска приказна е „Божиќна песна“ од Чарлс Дикенс – дело кое еднакво силно живее и на страниците на книгата и на филмското платно.
Овој класик е совршен избор за празнично читање, но и одлична препорака за филмска вечер во кругот на семејството.
„Божиќна песна“ ја раскажува приказната за сметководителот и скржавец Ебенизер Скруџ, човек кој целосно ги отфрла божиќните обичаи и сè што симболизираат тие – несебичност, човечност и топлина. За него, Божиќ е само уште еден обичен ден.
Но, за време на една студена божиќна ноќ, што решава да ја помине осамен, Скруџ го посетува духот на неговиот покоен партнер Џејкоб Марли, а потоа и духовите на божиќното минато, сегашност и иднина. Преку овие натприродни средби, Скруџ е принуден да се соочи со сопствените постапки, пропуштени шанси и последиците од својот себичен живот – патување што води кон длабока лична преобразба.
Новелата, првпат објавена во 1843 година, веќе 185 години е постојано во печат, преведена на многубројни јазици и адаптирана во безброј сценски и филмски верзии – доказ за нејзината универзалност и вечна актуелност.
Книгата „Божиќна песна“ е достапна во издание на „Либи“, дел од „Арс Ламина публикации“, и е вклучена во листата на лектирни изданија, што ја прави одличен избор и за млади читатели, но и за возрасни кои сакаат повторно да се навратат на класиката.
За оние што сакаат приказните да ги доживеат и визуелно, анимираниот филм „Божиќна песна“ („A Christmas Carol“) од 2009 година во продукција на „Дизни“ е впечатлива и поинаква интерпретација на делото на Дикенс.
Филмот е режиран, напишан и продуциран од Роберт Земекис, а во главната улога блеска Џим Кери, кој преку технологија motion-capture им дава живот на неколку ликови, вклучувајќи го и Скруџ. Гласовите ги позајмуваат актерите: Гери Олдман, Колин Фирт, Боб Хоскинс, Робин Рајт Пен и Кери Елвес.
Анимацијата е изработена со техника motion-capture, позната од филмови како The Polar Express и Beowulf, што му дава на филмот реалистичен, но и мрачен визуелен тон.
Филмот доби пофалби за визуелниот изглед, музиката и актерските изведби, а освои и признанија, меѓу кои и награда за Џим Кери на Kids’ Choice Awards.
Без разлика дали ќе ја изберете книгата, филмот или – уште подобро – и двете, „Божиќна песна“ нè потсетува дека никогаш не е доцна за промена, дека добрината има моќ да го преобрази човекот и дека вистинскиот дух на празниците се наоѓа во споделувањето со другите. Ова е приказна што се чита, гледа и чувствува – особено во овој магичен, празничен период.
Книгата е достапна во книжарниците на Литература.мк и онлајн преку www.literatura.mk.
