.jpg)
Овој празничен викенд ви го препорачуваме анимираниот филм „Кралицата на Срцата го забрани Божиќ“, во режија на Питер Бејнтон, кој е инспириран од сликовницата „Ноќта пред Божиќ во Земјата на чудата“. Книгата од авторот Карис Бексингтон, со илустрации на Кејт Хиндлина, на македонски јазик е во издание на „Либи“, дел од „Арс Ламина – публикации“. Во долгометражниот цртан филм користени се илустрациите од сликовницата, што ја прави приказната уште поволшебна и препознатлива за најмладите.
Во приказната, Принцезата Срце, како дете, му пишала писмо на Дедо Мраз, но тоа стигнало до него со големо задоцнување. Десет години подоцна, таа станува зла Кралица на Земјата на чудата која мрази Божиќ. Но, Дедо Мраз, тргнат на пат во санката со впрегнати ирваси, решава да ја исполни заборавената желба. Со помошта на љубопитната мала Алиса, почнува волшебна авантура во стихови, која завршува со прекрасен пресврт – Кралицата Срце се зарекува дека ќе биде љубезна и добра.
Сликовницата и филмот ќе ги стоплат срцата на децата, но и на возрасните, создавајќи празнична магија и порака за љубовта, милоста и радоста. Гласовите за главните улоги ги по позајмуваат: Џерард Батлер, Емилија Кларк и Симон Ешли.
