.jpg)
Постојат приказни што со векови тивко чекаат некој да им го даде гласот што го заслужуваат. „Хамнет“ од Меги О’Ферел е токму таква приказна. Повеќе од четиристотини години, животот и смртта на синот на Вилијам Шекспир остануваат речиси незабележани во сенката на неговото генијално творештво – сѐ додека Меги О’Ферел не ѝ подари душа, емоција и длабочина на оваа заборавена судбина.
Романот „Хамнет“ е едно од најнаградуваните книжевни дела во последните години – светски бестселер, добитник на престижните награди „Women’s Prize for Fiction“ и „British Book Awards“ и, според многу критичари, круна на книжевната кариера на О’Ферел. Романот „Хамнет“ од Меги О’Ферел на македонски јазик е во издание на „Арс Либрис“, дел од „Арс Ламина – публикации“.
Ова тивко, но длабоко книжевно ремек-дело доби и своја филмска адаптација. Историската драма „Hamnet“, во режија на оскаровката Клои Жао, е создадена во блиска соработка со самата Меги О’Ферел, која е коавторка на сценариото.
Филмот ја драматизира љубовната врска и бракот меѓу Агнес (Ен) Хатавеј и Вилијам Шекспир, како и разорната загуба на нивниот единаесетгодишен син Хамнет – трагедија што засекогаш ќе го обележи нивниот однос и ќе стане тивка инспирација за создавањето на „Хамлет“.
Во главните улоги блескаат Џеси Бакли (Агнес Хатавеј) и Пол Мескал (Вилијам Шекспир), чии изведби добија исклучителни пофалби од критиката, а во актерската екипа се и Емили Вотсон и Џо Алвин. Џеси Бакли за оваа улога освои „Златен глобус“ и награда Critics’ Choice за најдобра актерка, беше номинирана за SAG награда и ја доби наградата Vanguard на Palm Springs Film Festival.
Филмот премиерно беше прикажан на Филмскиот фестивал во Телурајд и се најде меѓу десетте најдобри филмови за 2025 година според Американскиот филмски институт (AFI).
„Хамнет“ е роман за двајца исклучителни луѓе поврзани со длабока љубов, но и со незамислива загуба. Во летото 1596 година, во Стратфорд, нивниот мирен семеен живот се распаѓа кога малата Џудит ненадејно се разболува. Нејзиниот брат близнак Хамнет тргнува во очајна потрага по помош – мајката Агнес е далеку, таткото во Лондон. Никој не претчувствува дека токму ова дете ќе го загуби животот.
О’Ферел создава нежен, болен и незаборавен портрет на момче чијшто краток живот ќе остане запаметен само преку името на една од најголемите драми во светската литература. Тоа е приказна за тагата што разорува, но и за љубовта што опстојува – и за уметноста што се раѓа од болката.
Филмската адаптација на „Хамнет“ бележи исклучителен успех на светските филмски фестивали. Критичарите особено ги истакнаа суптилната режија на Клои Жао, визуелната поетика на филмот и маестралните актерски изведби на Џеси Бакли и Пол Мескал. Филмот доби исклучително високи оценки од светската филмска критика, со пофалби дека станува збор за еден од најнежните и најемотивни историски филмови во последната деценија. Редовно се најде на листите за најдобри филмови на 2025 година, вклучувајќи ја и престижната селекција на Американскиот филмски институт (AFI), а се очекуваат и номинации за Оскар, особено во категориите за главни актерски улоги, адаптирано сценарио и режија.
По успешната фестивалска и ограничена кинодистрибуција, филмот наскоро ќе биде достапен и во редовната кинопрограма. Доколку сакате филмови што оставаат тишина по одјавната шпица – и книги што долго одѕвонуваат кај читателот – „Хамнет“ е приказна што не треба да ја пропуштите. Прво прочитајте ја. Потоа, доживејте ја и на филмското платно.
Книгата е достапна во книжарниците на Литература.мк и онлајн преку www.literatura.mk.
