Трагедија, љубов и човечка поврзаност - „Драг Едвард“ од Ен Наполитано

Од најтемните моменти се раѓаат приказни што ни ги откриваат најдлабоките човечки чувства - загубата, смислата и надежта.

Романот „Драг Едвард“ од Ен Наполитано, во издание на „Арс Либрис“, дел од „Арс Ламина - публикации“, е едно од оние дела што тивко, но моќно ја освојуваат публиката. Наполитано, која има објавено уште три романи и со години работела како заменик-уредник на литературното списание One Story, со оваа книга се најде на листите на најдобрите изданија за 2020 година, според The Washington Post, LibraryReads, Parade и Amazon.

Во центарот на приказната е дванаесетгодишниот Едвард Адлер, кој патува со своето семејство и уште 183 патници на летот од Њујорк до Лос Анџелес. Меѓу нив се финансиски вундеркинд активен на Волстрит, млада девојка која се соочува со несакана бременост, ранет авганистански ветеран, бизнис-тајкун и слободоумна жена која бега од својот маж. И тогаш - авионот се урива. Едвард е единствениот преживеан.

Случајот на Едвард го привлекува вниманието на јавноста, но нему му е тешко да се соочи со загубата на семејството. Непрестајно чувствува дека душевниот мир го изгубил на оној судбоносен лет и дека неговата судбина засекогаш е врзана со авионот и со останатите патници. Но, тогаш открива нешто сосем неочекувано - нешто што ќе го доведе до одговорите на многу важни прашања: Како да се пронајдеш себеси кога си изгубил сè? Како да најдеш смисла во новиот живот? Што е разликата меѓу преживувањето и живеењето?

Приказната „Драг Едвард“ доби и своја телевизиска адаптација, која се емитува на Apple TV+ од февруари 2023 година. Серијата ја следи истата емотивна приказна од романот, прикажувајќи го патот на закрепнување на Едвард и поврзаноста меѓу луѓето засегнати од трагедијата. Сценаристот и продуцент Џејсон Катимс ја создаде серијата со фокус на човечките приказни и емоции.

Во главната улога е младиот Колин О’Брајан како Едвард, а покрај него настапуваат и Тејлор Шилинг и Кони Бритон. Она што ја издвојува серијата е нејзиниот фокус на поврзаноста меѓу луѓето - како тагата може да создаде нови врски и неочекувани пријателства. Таа нуди поширока слика за последиците од трагедијата и начинот на кој различни луѓе се справуваат со загубата.

„Драг Едвард“ е приказна што не се заборава лесно. Таа потсетува дека и во најтемните моменти постои можност за нов почеток.

„Драг Едвард“ е достапна во поголемите книжарници низ државата и онлајн на www.literatura.mk.