.jpg)
„Портрет од ќерамичка чинија насликан со боите на Медитеранот и сочните мириси на цитрусните плодови”
Уште во бременоста, благодарение на феталната циркулација, се создава нераскинлива врска помеѓу мајката и бебето проследена со мал милион хемиски промени. Покрај медицината за оваа моќна и натприродна врска често се пишувало (еден пример е и жртвата на Лили Потер за „момчето што преживеа“ ) Ребека Серл го вметнува митот за патолошката поврзаност помеѓу мајката и ќерката во летниот книжевен хит „Едно лето во Италија“. Иако од старт релацијата на двете женски протагонисти е толку цврсто плацентирана што напати делува нездраво, па дури и се поставува прашањето “дали љубовта на детето кон мајката, и обратно, е единствената искрена и безусловна љубов што човекот може да ја почувствува”?
Кети Силвер има сѐ што би посакала една девојка- мајка-најдобра-пријателка, сродна душа од академските денови, удобен живот со најситни детали на комодитет, сѐ додека љубовта на нејзиниот живот не умре. Погодивте нели? Името ѝ е Керол Алмеа Силвер.
По загубата на Керол и плановите кои не стигнале да ги реализираат, Кети станува очајна и летаргична. Одеднаш се соочува со секој страв што го имала, не е задоволна од изборите што ги направила во животот и тие што животот ги направил наместо неа. Во желба да ја оживее носталгијата и растечените жолчки на спомените да прелеат уште еднаш во нејзиното секојдневие, како и секој главен лик од бестселер, предводена од импулсивноста, ја чекира картата за Позитано. Ова патување бил долгогодишен сон на мајка ѝ на кое, за жал, таа никогаш нема да стигне. Кети сега е тука, иако со главата нурната под купот одлуки што ја измачуваат како најсуштинската: дали бракот со сопруг каков секоја жена би посакала бил грешка?
Покрај турбулентниот дневен распоред да го совлада духот на Позитано за една седмица, згодниот Адам и судбината на хотелот „Посејдон“ во кој индиректно е вмешана, копнежот ја воскреснува нејзината мајка речиси како да се наоѓа на средината во бајка, се запознава со Керол, но не таа што ѝ ја лекувала температурата и бдеела над неа, туку таа што флертува со исончаните Италијанци и секоја болка ја поминува покрај чаша Аперол. Дали Кети доживеала нервен слом? Дали теоријата на заговор за скршеното срце и сугестивната мисла е голема вистина? Или патува низ времето?
Покрај тоа што е забавна романтична траги-комедија и успешно се вклопени моменти од популарната психологија, во голема мера „Едно лето во Италија“ е вистински туристички информатор, веродостојно предаден патепис за волшебното Позитано, точката во која кристалното небо и азурното море водат љубов над куќите со шарени фасади. Одлична гастрономска карта за авантуристите кои покрај патната исправа сакаат да чуваат и по некоја книга во ранецот поврзана со нивната дестинација, богата со мириси, вкусови и глетки: овошни вина, освежителни салати, медитерански орнаменти, лимонови дрвја и креми за сончање. Ребека Серл му нуди на читателот незаборавно искуство “ книгата е патешествие “ и го шета преку пишаниот збор низ камените плажи и пастелните зајдисонца на брегот Амалфи.
