.jpg)
Оглас: Кафе со зачини од тиква, прав есенски деликатес во кафетеријата „Скутерс“, на име Ејми
Кафето ги поврзува сродните души, а служи и како одличен изговор за прв состанок. Во случајот на Изи, кафето е поврзано со невина кражба и со нетрпението да се вкуси порочниот пијалак. Кога лажно ќе се одѕвие на името Ејми, инстант-кармата стартува и го истура врелиот пијалак врз уште поврелиот тип, кој подоцна, неслучајно, го добива прекарот господин Гради.
Иако изговорот на Изи е дека брзала за првиот работен ден како службеничка за човечки ресурси, моралните судии на Блејк и на Изи не се едногласни во изречената пресуда. Судбината ја соочува гради в гради со господин Гради кога ќе дознае дека е нејзин шеф во компанијата „Елис“. Блејк воопшто не е воодушевен од слатката приказна на Изи, од тоа а како за момент станала Ејми и како практично украла нечие кафе. Блејк го гради животот според старомодни вредности и според цврсти етички принципи, а мрази лаги и заобиколувања.
Првата средба, која можела да биде романтична верзија на „Како ја запознав мојата девојка“, прераснува во тивка војна, наоружана со тензија и со емоционално превирање меѓу Изи и Блејк.
Изи е несредена и хаотична, никогаш не ја затвора вратата и живее во мала зграда со своите братучеди. Ужива во ноќите играјќи „Билборд глупаци“ и ја гледа „Мала куќа во преријата“. Блејк е намќор и арогантен, предаден на работната рутина и на корпорациските правилници, а под костумот е нежен, внимателен и педантен, искрен човек што ја прифатил феминизираната верзија во себе, па станал фанатик за дисциплина и за организација и љубител на мачки.
Помеѓу гломазните разлики се исправа псевдонимот Ејми, кој ќе ја продолжи нивната платонска и отпрвин непријателска врска, ќе ја скрие во кожурокот на невиноста и на опсесијата – толку остра предигра што полека се прегрева, додека последните одронки восок паѓаат од нивните души.
Дали симпатијата го раскршува оклопот и дали може да ги надмине убедувањата што се наталожиле како карактерни седименти? И дали првичниот впечаток е пресуден или љубовта се случува и на втора шанса?
Оваа романса е пливање во безбеден периметар кон длабокото, кога нозете полека се одвојуваат од тлото во потрага по апнеичен адреналин и виор што растропотаното срце го остава во главата. „Случајно Ејми“ е слатка романса, напишана во манирот на модерните врски што напоредно созреваат со растењето на ликовите.
Јована Матевска Атанасова
