.jpg)
Постои генерално уверување дека секој може да стане писател, а истото го потврдува и Џин Ханф Корелиц во насловот на првото поглавје. Сепак ретко кој се осмелува да говори јавно и без ублажување за манијата на пишувањето како директна последица на желбата да се биде плодотворен и читан автор. Пишаниот збор е состојба еквивалетна на зависност без разлика дали се консумира само преку читање или преку создавање.
Џејкоб Финч Бонер е писател со исцрпен резервоар на инспирација што поминува на стара слава. Кога на колеџот Рипли, на неговата програма за креативно пишување, ќе се запише и арогантниот Еван Паркер, фалејќи се со заплет што толку таинствено го крие, a имајќи ја во предвид писателската параноја, Џејкоб е обземен. Целото внимание го насочува да го дознае совршениот заплет на Еван и конечно успева да го изманипулира. Заплетот е извртен, необичен, чуден! Во Џејкоб пука капсулата на завист и полека се разлева. Гледајќи го Еван, кој воопшто не се вклопува во профилот на талентиран писател и споредувајќи се себеси, писател што очајно се обидува да опстои помеѓу големите имиња што го туркаат од редот, Џејкоб паѓа во транс од очај и голема фрустрација. Барем додека не поминат години и кога ќе сфати дека Еван е сѐ уште анонимец, а подоцна и кога во неговата посмртница ќе дознае зошто не успеал да лансира го лансира долгоочекуваниот роман.
Мал момент на морално колебање и Џејкоб го присвојува заплетот што ветува инстант бестселер. На крстосницата да го закопа заплетот засекогаш со Еван или да го воскресне под сопствена амбалажа тој се разубедува дека никому нема да наштети со одлуката. Ниедно нечесно дело не поминува неказнето. По неколку безгрижни години од сензационалното објавување на романот со едноставен наслов “Измама” ( што донекаде е проекционо признавање за измамата што и самиот ја извршил ) Џејкоб добива закани по имејл дека тој е измамник што го украл заплетот. Испраќачот ветува дека ќе го разоткрие. Дали Џејкоб е подготвен да изгуби сѐ—репутацијата, љубовта и мултимилионерскиот договор за филмска адаптација и режија на Спилберг? Принуден е да се впушти во истрага по сопствено сценарио и да открие кој бил Еван Паркер, дали заплетот е плод на фантазија и писателски вознес или во него се крие траорно искуство?
Јована Матевска-Атанасова
