.jpg)
Во светот на социјалните мрежи во којсодржината често е брза и минлива, постојат профили што создаваат простор за подлабоко читање, за размислување и за искрена љубов спрема книгите. Еден таков е букстаграм-профилот @mellisreading, зад кој стои Мелиса – читателка што својата страст кон литературата ја претвори во заедница на споделување, на препораки и на разговори за книги без филтер и без граници.
МОЈАТА БУКСТАГРАМ-ПРИКАЗНА
Како започна твојот букстаграм-профил?
- Приказната како настанал мојот профил за книги започна со тоа што веќе не можев да објавувам на приватен профил рецензии и мислења за книги, затоа креирав нов, во кој можев да комуницирам со сите љубители на пишаното и запознав многу пријатели.
Која е првата книга што ја паметиш по сопствен избор?
- Првата книга што ја паметам, а е по мој избор е „Ладнокрвно убиство” од Труман Капоти... . Ја читав на зимски распуст. Ја паметам бидејќи е базирана на вистински настан во Америка.
Што те натера да се вљубиш во читањето?
- Бегството од реалноста, нови светови и магии. Можноста да се исклучам неколку часа додека читам ме натера да се вљубам во книгите и е нешто незаменливо.
Кој жанр најмногу го сакаш и зошто?
- Најмногу ги сакам жанровите фантазија и трилер/хорор. Сакам брутални убиства и книги што те носат во друг свет.
Дали книгите ги купуваш импулсивно или плански?
- Книгите ги купувам калкулирано, ако е серијал и сакам да ги поседувам во својата библиотека ќе ги купам, ако е од омилен автор исто. Но, ако е кратка романса што можам онлајн да ја прочитам можно е и да не ја купам никогаш.
Колку книги има во твојата домашна библиотека и кој ти е омилен агол за читање?
- Во мојата домашна библиотека има повеќе од 200 книги и омилен агол ми е мојот кревет каде што можам удобно да уживам во приказните.
Која книга те расплакала или најмногу те допрела емотивно?
- Јас сум емотивец, дали било драма или хорор. Кај последната книга што ја прочитав „Dark Matter“ — научна фантастика, ме расплака одлучноста на главниот лик да си го спаси семејството по цена на сѐ, а љубовта е таа што победува.
Која книга ти помогнала во тежок период?
- „Невидливиот живот на Ади Лару“ ја прочитав во период од мојот живот во кој изгубив една многу блиска личност – мојата баба. Научив дека сѐ во животот е минливо и дека е важно да оставиме трага зад нас. Таа книга ми помогна и ми е омилена засекогаш.
Со кој лик најмногу се поистоветуваш?
- Ади Лару е девојка на која наликувам по малку – бунтовна, уметничка и истражувачки настроена. Не запира по цена на ништо и дава сѐ од себе да успее.
Ако можеш да живееш еден ден во свет од книга?
- „Хари Потер и затвореникот од Азкабан“
Книга што ти го променила начинот на размислување?
- „Five Feet Apart“ – емотивна приказна за љубовта и за болеста што не дозволува допир, и за загубата што менува сè.
Омилен цитат од книга?
- „Сите приказни се вистинити.“ („Град од коски“ – Касандра Клер)... „Сите приказни се вистинити – чудовишта, ангели, демони… и сите ние што сакаме да го спасиме светот.“
Книга што би сакала да ја прочиташ повторно за првпат?
- „Шест врани“ – Ли Бардуго
КНИГИ И ФИЛМОВИ
Дали прво ја читаш книгата или го гледаш филмот?
- Секогаш прво книгата, потоа филмот – и секогаш книгата е подобра.
Која адаптација е најдобра?
- „Господар на прстените“ – совршено пренесени атмосфера, емоции и магија.
Која те разочарала?
- „Ова завршува со нас“ – филмот комплетно ја промени суштината.
OFFLINE BOOK CLUB BY ARS LAMINA
Од какво значење е за тебе Offline Book Club-от?
- Самото учество и слободата за разговор без филтри е нешто најдобро осмислено.
Што најмногу ти се допаѓа?
- Разновидноста на ставовите и почитта спрема различни мислења.
Како ти го промени искуството?
- Секоја нова книга носи и нова инспирација за уметност и за цртање на рабовите.
Највпечатлив момент од клубот?
- Првиот состанок и дискусијата за книга од Сара Пеканен.
Порака за нови членови?
- Да не размислуваат многу – клубот е искуство што те принудува повторно да се вљубиш во книгите.
БРЗИ ПРАШАЊА
Физичка (од хартија) или е-книга? - Физичка копија.
Обележувач или свиткано ќоше? - Обележувач (макар и сметка).
Кафе или чај (или можеби вино/коктел) додека читаш? - Кафе и чај – зависно од моментот.
Една книга или неколку паралелно? - Неколку книги паралелно.
Книжарница или библиотека? – Книжарница.
Купување книги или добивање книги на подарок? - И купување и подарок книги.
Омилена полица во домашната библиотека? - Полицата за фантазија.
Книга што никогаш нема да ја позајмиш на никого? - „Illuminae“ (ниту една од трилогијата)
