.jpg)
Постојат приказни што прво се читаат, па потоа се гледаат - и такви што засекогаш остануваат некаде меѓу страниците и филмското платно. Токму во тој простор меѓу книгите и филмовите живее светот на @books_vsmovies, создаден од Александра Крстевска.
Нејзиниот букстаграм не е само колекција од препораки, туку мало филмско-литературно универзумче во кое секоја книга има свој кадар, секој лик своја сцена, а секоја емоција свој close-up. Од случајна идеја, родена во тежок период, таа гради простор каде што приказните не се само прочитани или изгледани - туку доживеани.
Во ова интервју зборуваме за книгите што би биле совршен филм, за филмовите што ја менуваат перцепцијата на читањето и за магијата што се случува кога една приказна ќе го најде својот пат и до страницата и до екранот.
*Како започна твојата букстаграм-приказна?
- Многу спонтано и непланирано. Во еден тежок приватен период сосема случајно ми дојде идеја да го креирам профилот, и тоа е една од моите најдобри одлуки што сум ги донела. Голема пасија ми се книгите, но и филмовите и ТВ-сериите, па, оттука, доаѓа и името на профилот.
*Која беше првата книга што ја прочита по сопствен избор и сè уште ја паметиш?
- Тоа е романтичната комедија „Знаеш ли да чуваш тајна?“ од Софи Кинсела.
*Што те натера да се вљубиш во читањето?
-Љубовта спрема книгите и спрема читањето ја наследив од мојата постара сестра, а многу сум среќна што успеав да ѝ ја пренесам на мојата внука.
*Кој жанр најмногу го сакаш и зошто?
- Како што поминуваат годините, сфатив дека не сакам да ги определувам книгите по жанрови, туку по емоции и по расположение.
*Дали книгите ги купуваш импулсивно или имаш однапред подготвена листа?
- Порано би рекла дека мојот најголем проблем беше импулсивното купување, но во последно време тоа се смени и сум многу горда што имам самоконтрола.
*Покажи ни ја твојата домашна библиотека – колку книги имаи кој е твојот омилен агол за читање?
- Мојата домашна библиотека има околу 600 книги од различни жанрови. Омилено место за читање ми е дневната соба, каде што се наоѓа и самата библиотека.
*Која книга најмногу те трогна/расплака?
- Јас сум емотивец и не е тешко да ме расплаче книга, но ако треба да изберам една, тоа би била „Хамнет“ од Меги О’Фарел.
*Која книга ти помогнала да поминеш низ тежок период во животот?
- „Сите твои совршености“ од Колин Хувер, бидејќи и јас во тој период се соочував со сличен проблем.
*Кој книжевен лик најмногу потсетува на тебе?
- Дајана од „Посакувам да си тука“. И јас, како неа, бев човек што сака да планира, но животот ме однесе во насока што ме промени целосно.
*Ако можеш да живееш еден ден во светот на една книга, која би била?
- Во сите божиќни книги на Сара Морган, бидејќи сум вечен романтичар.
Дали некогаш си прочитала книга што целосно ти го променила начинот на размислување? Која?
-„Неверојатно бистри суштества“ од Шелби ван Пелт. Ме научи да ги гледам октоподите со поголема љубов и почит.
*Кој е најубавиот цитат што ти останал во сеќавање?
- „Кога сакаш нешто, целиот универзум се здружува за да ти помогне да го оствариш.“ – „Алхемичарот“ од Пауло Коелјо
*Кога последен пат затвори книга и остана без зборови?
- Дефинитивно „Посакувам да си тука“ од Џоди Пико. Најшокантниот пресврт што сум го прочитала досега.
*Книга што би сакала да ја прочиташ повторно за првпат?
- Животот е краток за да гледам или за да читам нешто по вторпат, но не би ми пречело повторно да ја прочитам „Папата Јована“ од Дона Вулфолк Крос.
Книги и филмови
*Што сакаш повеќе – прво да ја прочиташ книгата или да го гледаш филмот?
- Дефинитивно прво книгата, па потоа филмот.
*Која филмска или ТВ-адаптација според тебе е подобра од книгата?
- Серијата „Off Campus (The Deal)“ според истоимената книга на Ел Кенеди.
*Која екранизација најмногу те разочарала?
- Филмот „Ова завршува со нас“ според истоимената книга на Колин Хувер.
Offline Book Club
*Во колкава мера клубот ги исполнува твоите потреби за книжевно дружење?
- Самиот факт што по секоја средба сум насмеана и полна со енергија значи дека моите очекувања се исполнети.
*Што најмногу ти се допаѓа кај средбите на клубот?
- Дискусијата, спонтаноста и отвореноста на членовите да се изразат, без огледдали мислењата се исти или различни.
*Дали клубот те поттикна да читаш книги што инаку не би ги избрала?
Да, и тоа особено ми се допаѓа.
*Што значи за тебе да разговараш за книги со луѓе што ја делат истата страст?
- Исполнување на мојата желба да ја споделам љубовта спрема книгите со други луѓе.
*Кој момент од Offline Book Club најмногу ќе ти остане во сеќавање?
- Кога на првата средба, по само 10 минути, членовите прашаа кога ќе биде следната.
*Што би му порачала на некој што размислува да се приклучи?
- Дека го очекуваат три исполнети часа, полни со убави дискусии и со нови познанства.
⚡ Брзи прашања
Физичка или е-книга? – Физичка
Обележувач или свиткано ќоше? – Обележувач
Кафе или чај (или вино/коктел)? – Кафе
Една книга или неколку паралелно? – Една, максимум две
Книжарница или библиотека? – Книжарница
Купување или подарок книги? – И двете, плус подарување
Омилена полица? – Книгите наредени по боја
Книга што никогаш нема да ја позајмиш? – „Хамнет“
