.jpg)
Фантастичниот свет создаден од британскиот автор Филип Пулман во трилогијата „Темната граѓа“ оживеа на малите екрани во ТВ-серијата „Неговата темна граѓа“ (His Dark Materials), копродукција на HBO и BBC. Овој грандиозен проект, сниман во три сезони од 2019 до 2022 година, останува верен на приказната од книгите, со талентирана актерска екипа, визуелна магија и длабоки филозофски теми.
Трилогијата на Пулман – составена од книгите „Поларна светлина“, „Суптилниот нож“ и „Килибарниот дурбин“ – е наменета за млади читатели, но својата популарност ја должи и на возрасната публика, благодарение на комплексната приказна, богатиот свет и темите за моќ, вера, наука и слобода. Овие книги се достапни и на македонски јазик во издание на „Арс Либрис“, дел од „Арс Ламина – публикации“.
„Неговата темна граѓа“ е сместена во мултивселенска реалност каде што душите на луѓето се манифестираат како животински придружници – дајмони. Главната хероина, Лира Белаква (Во серијата: Дафне Кин), е сираче што расте во „Џордан колеџ“ во Оксфорд. Нејзината потрага по исчезнат пријател ја открива мистеријата на супстанцата наречена „Прашина“ и ја води низ авантура што се протега низ светови. Со неа патува и Вил Пери, тинејџер од „нашиот“ свет, чие пророштво може да ја промени судбината на сите светови.
Серијата доби позитивни критики за сценографијата, адаптацијата и актерската екипа, меѓу која се издвојуваат Рут Вилсон (Мариса Култер), Џејмс Мекавој (Лорд Азриел), Амир Вилсон (Вил Пери) и други. „Темната граѓа“ нуди богат свет исполнет со морални дилеми, политички игри, научна мистерија и духовно истражување.
Во првиот дел, „Поларна светлина“, започнува авантурата на Лира Белаква во алтернативен Оксфорд, каде што мрачни сили и политички игри управуваат со судбините на децата. Таа тргнува кон Арктикот – земја на поларни мечки и магични ветрови – во потрага по вистината.
Во вториот дел, „Суптилниот нож“, на сцената стапува Вил Пери, кој бега откако ненамерно убива човек. Во паралелен свет, тој ја сретнува Лира и го наоѓа „суптилниот нож“ – оружје што може да сече низ светови.
Третиот дел, „Килибарниот дурбин“, носи голема завршница: Лира и Вил мораат да се соочат со огромна жртва додека световите се спојуваат во епска битка помеѓу слободната волја и догмата.
Првиот дел од трилогијата, „Поларна светлина“, беше адаптиран во филмот „Златниот компас“ (2007), со Никол Кидман, Даниел Крег и Ијан Мекелен. Иако филмот доби поделени критики, серијата го коригира тонот и ѝ даде поголема длабочина на приказната.
Трилогијата „Темната граѓа“ од Филип Пулман е достапна во сите поголеми книжарници и онлајн на www.literatura.mk.
