Ако сè уште не сте ја гледале „Дамски гамбит“, време е да ја додадете на вашата листа – не само како серија, туку и како книжевно дело. Најгледаната ТВ-серија на „Нетфликс“ за 2020 година не само што го направи шахот повторно „ин“, туку ја врати во фокусот и истоимената книга од Волтер Тевис, која е достапна и на македонски јазик, во издание на „Арс Либрис“, дел од „Арс Ламина – публикации“.
Серијата, составена од седум епизоди, ги освои сите важни телевизиски награди, а Ања Тејлор-Џој, која маестрално ја толкува главната улога, стана актерска сензација. Но, зад визуелниот спектакл и суптилната глума стои силна приказна која потекнува токму од романот – психолошки слој по слој раскажан портрет на една генијалност и нејзините последици.
„Дамски гамбит“ ја следи животната приказна на Бет Хармон – осумгодишно сираче кое тивко живее во сенка, сè додека не го открие светот на шахот. Во шахот, Бет не само што наоѓа утеха и смисла, туку и развива способност што ја води кон меѓународна слава. Но, патот до успехот не е ни малку лесен: нејзиниот генијален ум ја води низ тензични натпревари, но и низ лични демони, зависности и внатрешна борба.
Сместена во педесеттите и шеесеттите години, приказната го отсликува патријархалниот свет во кој млада жена се пробива на терен каде што доминираат мажите. Бет не се бори само на таблата 8×8, туку и со ограничувањата на општеството, со траумите од детството и со сопствените стравови.
Иако „Дамски гамбит“ е наречена по шаховски потег, оваа серија – и книгата – се многу повеќе од стратегија и интелект. Тоа е длабока и емотивна приказна за издржливост, самопронаоѓање и женска сила. За сите љубители на добри драми, психолошки комплексни ликови и силни женски протагонисти, ова е вистинскиот избор.
Книгата „Дамски гамбит“ од Волтер Тевис е достапна во сите поголеми книжарници и онлајн преку www.literatura.mk.
