.jpg)
На „Нетфликс“ од овој месец се прикажува мини-серијата во четири продолженија насловена како „Сета светлина што не можеме да ја видиме“, базирана на истоимениот роман на Ентони Дор – добитник на Пулицеровата награда.
Романот „Сета светлина што не можеме да ја видиме“ се наоѓа на листата на 25 најдобри книги на „Њујорк тајмс“. Преведена е на 30 јазици со тираж од 1,5 милиони продадени примероци.
Сценариото на ТВ-серијата базирана на овој роман го потпишува Стивен Најт, креаторот на планетарно популарната серија „Пики блајндерс“, а режисер е Шон Ливи („Ноќ во музејот“).
Дејството се одвива во Втората светска војна. Мари Лор е тинејџерка од Франција, која праќа шифрирани радиопораки на сојузничката команда за бомбардирање, а Вернер е млад нацистички радиотехничар кој има задача да ù влезе во трага додека паѓаат бомби и се приближуваат американските трупи.
Американската актерка Арија Миа Лоберти, која ја глуми Мари Лор, е слабовидна од раѓање. Ова е нејзина дебитантска улога, а ја добила по глобалната потрага по слепи и слабовидни актерки.
Мари Лор и Вернер ги поврзуваат многу нешта. И двајцата се соочиле со предизвици (таа е слепа, тој детството го поминал во сиропиталиште) и двајцата се силни, снаодливи личности. Вернер е вундеркинд, а сетилата за допир, мирис и слух на Мари се извонредни.
Имаат и заеднички ментор, анонимниот емитер по име Професорот, чии лекции, вклучувајќи ја и онаа дека „најважната светлина на светот е онаа што не можете да ја видите“, помогнала во формирањето на нивните карактери.
Мари Лор има две татковски фигури во својот живот: нејзиниот биолошки татко (Марк Рафало), кој прави сложени макети на квартовите за да може таа да ги запамети улиците; и вујкото (Хју Лори), херој од Првата светска војна, кој не го напуштил својот дом цели 20 години.
ТВ-адаптацијата на романот на Дор во некои сегменти отстапува од оригиналот. Сменета е судбината на главните ликови и некои од споредните ликови се потполни исфрлени. Но, тоа не влијаеше на популарноста на серијата што за само три дена стана една од најгледаните содржини на „Нетфликс“.
Романот „Сета светлина што не можеме да ја видиме“ од Ентони Дор е достапен со попуст од 70% во рамки на „Black Week“ акцијата во сите книжарници на „Литература.мк“ и онлајн преку следниот линк: https://www.literatura.mk/istoriska-fikcija/10153-seta-svetlina-sto-ne-mozeme-da-ja-vidime.
