.jpg)
„Рекичето можеби спиеше во моментот кога требаше да тргне, собирајќи сила за тоа што следува, а можеби и забрзано ги собираше омилените камчиња што сакаше да ги понесе со себе. Најважно е што тоа потече... и течеше, течеше, течеше и го најде својот пат.
Стекна нови пријатели, а се сретна и со старите. Промени повеќе форми и виде многу различни предели. Се почувствува слободно и силно.“
Со извадок од книгата за деца „Рекичето што сакаше да порасне“, во издание на „Либи“, дел од „Арс Ламина – публикации“, го одбележуваме Меѓународниот ден на реките (14 април). Оваа сликовница, илустрирана од македонскиот сликар и автор на книги за деца Ване Костуранов, со текст на српската авторка Ана Торма, носи топла порака за растењето и за минливоста на животот. Истовремено има и еколошка порака за грижа за природата и за значењето на реките за животот на нашата планета.
„Рекичето што сакаше да порасне“ е нежна лирска алегорија за дете кое е нестрпливо да порасне. Во својот прв книжевен текст Ана Торма прави симпатична, симболична „замена“ на дете со рекиче и на мајка со река. Така, малите читатели полесно ќе се идентификуваат со приказната и ќе станат свесни дека сè во светот (и животните и растенијата...) е еден вид одраз на луѓето, поточно на растењето, на созревањето и на заминувањето на луѓето, како животен циклус.
– Убавината на оваа книга е тоа што таа е повеќеслојна и има неколку важни пораки – дека сè е менливо и во постојано движење, па дури и кога тоа не е видливо, растењето на секое живо суштество и животниот циклус од раѓање – до смрт, надминувањето на нашите најголеми стравови со поддршката од нашите најблиски, како и едукативниот момент со водниот циклус во природата... При работата на сликовницата беше тешко да се замисли и да се претстави реката како главен лик во приказната, затоа што реката е во постојано движење и постојано се трансформира. Важно беше да се долови севкупното чувство што се провлекува во книгата, дека, освен водата, која постојано ги менува облиците, всушност сè што е живо е во постојан процес на менување – вели илустраторот Костуранов.
Ова е петта книга за деца од Ване Костуранов, во издание на „Арс Ламина“, по „Sвездено дете“ (2018), „Девојче и мече“ (2019), „Девојчето и градот“ (2020) и „Мирко Немирко“, со текст на Ана Ѓокиќ (2021).
Сликовницата „Рекичето што сакаше да порасне“, како и другите книги од Костуранов, се достапни во сите поголеми книжарници и онлајн преку www.literatura.mk.
https://www.literatura.mk/slikovnici/29540-rekiceto-sto-sakase-da-porasne
