Со лежерноста и предвидливоста на филмските ликови од мјузиклот "Мама миа" кои доволно влијаат на изградената петорка во романот "Лето како во "Мама миа", ќе уживате и пливајќи и планирајќи ја санацијата и враќањето на сјајот на Вила Атена.
Лорен е просечна девојка од Лондон која сиот живот се грижела за својата баба, единствената фамилија по смртта на нејзините родители. Откако баба ѝ Марни ќе умре, за неа не преостанува ништо друго освен да го запознае животот како што требало да го запознае порано, безгрижен, турбулентен и со исончаната кожа која мириса на сол. Удирајќи две муви со еден удар, таа го оживува копнежот на баба ѝ, но и сопствениот- да заборави на познатото, да биде странец што ќе се обидува да се вклопи во медитеранските шари. Штом стигнува на Скопелос Лорен го проширува, бездруго, величествениот видик и со пријателства: ексцентричната кокета, бабицата Енџи, брачниот пар Емили и Крис во исчекување на првото дете и мистериозниот писател Марк, кој како и секој суперхерој го крие сонцето зад широките раменици. Тука е и вилата во која престојува водена од силната Атена, вила позната по сјајот кој го изгубила низ децениите.
Вилата е и самата во својство на книжевен лик, се возобновува како што и ликовите ја доживуваат својата метаморфоза, допрена е и историјата на газдарицата на вилата, несреќната судбина на селските невести кои иако туризмот ги прехранува, често им го разрушува приватниот живот. Одеднаш Лорен има чувство како таму да припаѓа, во тврдоглавата и гласна Атена ја гледа својата Марни, па тоа чувство на припадност прераснува во чувство да помогне и да ја преземе иницијативата во свои раце.
Електрична и вибрантна, Робертсон прави паралела помеѓу одморот и забавата, летувачка дискрепанца на секој авантурист, вљубеник во патувањето и копнежот по вечно лето.
Додека ја читате постојано ќе ви се врти на риплеј "Мама Миа" на АББА, ќе ги мирисате грчките специјалитети, за ситните јазични рецептори ќе ви застане узото или силната метакса, но и цветните расади на маслинки, мандарини и портокали.
Предлог плејлиста за одмор по рецептот на "Лето како во "Мама миа"
- Waterloo на гладно, за расонување
- Dancing queen за лесна пловидба помеѓу морските бранови
- Fernando за испраќање на сонцето
- Summer night city за електрични ноќни прошетки
- Gimme! Gimme! Gimme за последниот атом енергија пред сладок сон
