.jpg)
Отворочен настан или чувство што ги отвора очите
Светот застанал многу пати пред 2020 година. Со секоја војна или светска криза, пандемија или гладоморје. Но, во 2020 кога Земјата ги прередуваше пршлените под нозете на луѓето, човештвото го разглоби концептот на среќен живот, колку она што го имаме е суштинско — слободата на движење, семејството, пријателите, и здравјето. Oттука произлегува суштинско прашање: Дали човекот ја учи среќата преку трагедија?
Дијана Оʼ Тул ужива во принципиелен и исполнет живот со однапред подготвена листа „да направам“. За една модерна девојка што се пробила во светот на уметноста и „заловила“ момче специјализант по хирургија, животот што го живее е остварување на сон. Самостојна, до одредена мера зависна од него, помалку финансиски и секако емоционално, Дијана со нетрпение го очекува нивниот заеднички одмор на егзотичниот Галапагос, испланиран пред триесеттиот роденден, кога и се надева дека Фин ќе ја запроси. Тогаш некој лилјак во Кина носи нов и невиден бран на ковид-вирус што започнува да дивее низ светот. Вирусот како и лошите вести за него брзо се пренесуваат и до копното на САД и секој доктор во Презвитеријанската болница во Њујорк е мобилизиран да се бори со овој невидлив непријател што се заканува да ја измени демографската карта на светот. Разочарана дека Фин нема да ја придружува и наоружана со егоистичната артилерија на самосожалување, затоа што, и покрај фактот дека луѓето се борат за здив на болничките кревети, таа ќе мора да го оствари патувањето сама, на непозната територија, сепак лета за Галапагос. Таму дознава дека поради заканата од вирусот авионските линии се во прекин и островот ќе биде во карантин во следните две недели. Хотелот ја остава на цедило, багажот ѝ е изгубен, а таа измачено, без нималку ентузијазам, се влече низ маршрутата што само пред неколку дена внимателно ја испланирала. Во пресрет ѝ излегува едно локално семејство, татко поранешен туристички водич со нескриен презир кон странци, баба олицетворение на архетипот на Големата Мајка и збунета тинејџерка што се самоповредува. Одеднаш патувањето добива цел. Дали ова патување ќе ѝ ги отвори очите на Дијана? Дали таа ќе доживее перипетија таква што ќе ја натера да ја преиспита дефиницијата за среќен живот? Но… Нема да ви откријам понатаму затоа што кулминацијата на книгата е можеби една од најдобрите што сум ги прочитала.
Роман што живее долго во вашата потсвест како дел од преживеаната популација по ковид-пандемијата, но, и отвора теми што ќе ви бидат интригантни за истражување. Џоди Пико со секој нов роман се надраснува и успева да го задржи вниманието на читателот до самиот крај.
Јована Матевска-Атанасова
