.jpg)
Нова сликовница што ќе ги насмее децата и ќе ги поттикне да гледаат на светот со љубопитност и имагинација пристигна во издание на „Либи“, дел од „Арс Ламина - публикации“. „Очилата на Медо“ од прочуениот белгиски автор и илустратор Лео Тимерс е топла и духовита приказна за едно изгубено парче очила и една необична авантура.
Медо не може да ги најде своите очила. Убеден е дека сигурно ги заборавил кај својата пријателка, жирафата Живка, па веднаш тргнува кон нејзиниот дом. Но, патот до таму е полн со изненадувања. Без очилата, Медо почнува да забележува животни што никогаш порано не ги видел во шумата - слон, крокодил, фламинго, елен... А кој е оваа долга шарена змија што лежи на лежалката на Живка?
Трпеливата Живка брзо ја открива вистината. Очилата на Медо се токму таму каде што најчесто се губат - на неговата глава. Но, тоа не е крајот на приказната. Возбуден од своето откритие, Медо ја води Живка да ги запознае чудесните животни што ги видел по патот, убеден дека направил неверојатно откритие.
Со препознатливите илустрации полни со детали, хумор и емоции, Лео Тимерс создава приказна што ги освојува и децата и возрасните. Низ една класична комична ситуација, тој вешто покажува колку поинаку може да изгледа светот кога го гледаме низ различни очи и колку е важно да ја задржиме детската љубопитност.
„Очилата на Медо“ е совршена сликовница за заедничко читање, која низ смеа зборува за пријателството, перцепцијата и радоста од откривањето на светот околу нас.
Книгата е достапна во книжарниците на „Литература.мк“ и онлајн преку www.literatura.mk.
