.jpg)
Романот „Дивиот мрачен брег“ од Шарлот Меконаги е моќна и неизвесна приказна за љубовта, довербата и опстанокот на самиот крај од светот. Книгата, која ги освои читателите ширум светот, сега е достапна и на македонски јазик, во издание на „Арс Либрис“, дел од „Арс Ламина - публикации“.
„Дивиот мрачен брег“ нè носи на Ширвотер - оддалечен остров недалеку од Антарктикот, каде што живее семејството Солт. Некогаш исполнет со истражувачи, денес островот е речиси напуштен, а неговото најголемо богатство е најголемата светска банка на семиња - надеж за иднината во свет што неповратно се менува.
За време на разорна бура, на брегот е исфрлена мистериозна жена по име Роуан. Нејзиното доаѓање го нарушува кревкиот мир на островот и отвора прашања на кои никој не е подготвен да одговори. Додека Роуан се зближува со Доминик Солт и неговите три деца, почнува да се чини дека токму таа е делот што недостасувал во нивното семејство. Но, и таа и Доминик кријат тајни, а со секоја нова бура, недовербата расте.
Кога ќе открие оштетени радиостаници и свежо ископан гроб, Роуан сфаќа дека на островот ништо не е онакво какво што изгледа. Додека светот околу нив се распаѓа, жителите на Ширвотер мора да одлучат дали можат доволно да си веруваат едни на други за да ги заштитат драгоцените семиња што им се доверени, но и дали можат да ги остават трагедиите од минатото зад себе за да создадат нешто ново, заедно.
Исполнет со неверојатни пресврти, вртоглава убавина и жестока љубов, „Дивиот мрачен брег“ е незаборавен роман за невозможните избори што ги правиме за да ги заштитиме луѓето што ги сакаме, дури и кога светот околу нас исчезнува.
Романот е достапен во книжарниците на Литература.мк и онлајн на www.literatura.mk.
