Сите ги сакаат еднорозите! Тие се толку убави, магични и нежни суштества. На магичен начин авторката Џули Сајкс раскажува за еднорозите и за нивните пријателки во волшебниот серијал „Академија за еднорози“. Книжевниот серијал во издание на „Либи“ дел од „Арс Ламина – публикации“ содржи шест романи за деца. Ова се приказни за еднорози и магија, но и за пријателството.
Во секоја книга има приказна за другарувањето меѓу девојчињата и еднорозите: Софија и Ѕуница, Скарлет и Блесок, Оливија и Снегулка, Ава и Ѕвезда, Изабела и Облак, Лејла и Танчар. Волшебните приказни се редат една по друга и кога ќе прочитате една, сигурно ќе посакате веднаш да продолжите со следната книга. Вистинско уживање со светки и многу авантури за сите љубители на еднорозите.
Овој волшебен книжевен серијал е инспирација за популарната анимирана серија за деца, „Академија за еднорози“, што се емитува на стриминг-сервисот „Нетфликс“. Досега се снимени две сезони, првата беше премиерно прикажана во ноември 2023 година, а втората сезона почна да се емитува на 27 јуни годинава. Оваа канадска серија, креирана од Мишел и Роберт Ламоро, е продуцирана од „Спин мастер“ и „Мејнфреим студиос“.
Во телевизиската адаптација главен лик е Софија, која се појавува и во сите книги од серијалот на Џули Сајкс. Како голема љубителка на коњите, Софија е пресреќна кога ќе добие покана да се приклучи на Академијата за јавање, за која подоцна ќе дознае дека е всушност Академија за еднорози, каде што ќе научи да јава на магичен еднорог - Вајлдстар (во книгата – Ѕуница). Таму ги запознава Ава, Изабел, Валентина, Лејла и Рори и нивните еднорози, со кои тргнуваат во незаборавна авантура откако мрачна сила се заканува да го уништи Островот на Еднорозите, каде што се наоѓа Академијата.
Храбрата Софија и нејзините пријатели мора да ја заштитат својата сакана магична академија од злобната Ревензела. Во борбата со Ревензела, Софија ќе ја открие магијата на еднорозите и ќе ја разоткрие мистеријата за исчезнувањето на нејзиниот татко. По пат ќе научи дека тајната на борбата против лошите сили е тимската работа и пријателството...
Втората сезона почнува со маскенбал во чест на ретката Самовила Месечина. Софија и Вајлдстар се впуштаат во магична потрага да ги пронајдат ѕвездите кои паѓаат на соѕвездието Еднорог, со надеж дека Софија може да го врати својот татко. Но, не се сите членови на групата „Сафири“ во мисијата, и има мистериозен странец кој го следи островот, обидувајќи се прво да стигне до ѕвездите.
Гласот за Софија Мендез го позајмува Сара Гарсија, а во преостанатите улоги се јавуваат: Сејди Лафлам-Сноу (Ава), Габриела Космидис (Изабел Армстронг), Кари Вонг (Валентина Вал Фјури), Камаја Фербурн (Лејла Флечер) и Колтон Стјуарт (Рори Кармајкл). Серијата е во режија на Каси Симондс.
Книгите се достапни во сите поголеми книжарници, и онлајн преку www.literatura.mk.
