.jpg)
Ако барате нежна, магична и поучна серија за деца – инспирирана од омилените детски книги - „Исидора Мун прави зимска магија“ е вистинскиот избор за оваа сезона.
Станува збор за епизода од анимираниот серијал Isadora Moon, кој се емитува на Sky Kids (TV Sky) и е базиран на книжевниот серијал „Исидора Мун“ од авторката Хариет Мункастер.
Во оваа блескава зимска специјална епизода, Исидора и тетка ѝ Кристалка заминуваат во земјата на мразот и снегот за да го спасат снежното момче – пред тој да се стопи. Исидора обожава да си игра на снег, особено кога нејзините снежни фигури оживуваат, но зимската магија не трае вечно. Ќе успее ли да ги спаси навреме своите нови снежни другарчиња? Преку топла приказна полна со фантазија, серијата зборува за пријателството, грижата за другите, храброста и прифаќањето на различностите – теми блиски и важни за секое дете.
Книжевниот серијал „Исидора Мун“ од Хариет Мункастер на македонски јазик е во издание на „Либи“, дел од „Арс Ламина – публикации“. Досега се објавени 16 книги за Исидора Мун и 6 книги за Мирабела – палавата братучетка на Исидора.
Исидора Мун е половина самовила, половина вампир – и целосно уникатна! Нејзината мајка е самовила, татко ѝ е вампир, а таа совршено ги спојува двата света. Токму затоа Исидора е хероина со која лесно се идентификува секое дете што некогаш се прашало каде припаѓа и што го прави посебно. Исидора е препознатлива по нејзините црно-розови фустанчиња со светки, волшебното стапче со ѕвездичка, магичните крилја и по нејзиното најверно пријателче – Розовото Зајаче. Нејзиниот свет е исполнет со летечки облачни автомобили, вили, вампири, змејчиња и многу нежна магија.
Како и сите деца (без разлика дали се луѓе, самовили или вампирчиња), Исидора учи како да биде храбра, како да им помага на пријателите, да преземе одговорност и да ги прифати своите граници – откривајќи дека може многу повеќе отколку што мисли.
„Исидора Мун прави зимска магија“ е идеална серија за заедничко гледање на родителите и децата – тивка, визуелно нежна и со важни пораки за прифаќање, емпатија и самодоверба. А, потоа… време е за читање!
„Исидора Мун прави зимска магија“ и преостанатите книги од серијалот за Исидора МУн се достапни во книжарниците на Литература.мк и онлајн преку www.literatura.mk.
Песничката од зимската епизода можете да ја слушнете тука:
